မိုင်းအရှိုင်း၊ ဇူလိုင် ၂၉ ရက်၊ သိန္နီ
ကိုးကန့်တပ် – MNDAA ထိန်းချုပ်ထားတဲ့ သိန္နီမြို့ကနေ MNDAA က ပစ္စည်းအပြောင်းအရွှေ့တွေလုပ်နေပြီး ပြန်ဆုတ်ဖို့ လုပ်ဆောင်နေတယ်လို့ သိန္နီဒေသခံတစ်ဦးက ရွှေဖီမြေကို ပြောပါတယ်။
“ပစ္စည်းသယ်သွားတာတော့ ဒီနေ့ (ဇူလိုင် ၂၉ ရက်) ပဲ။ ဘယ်လိုပစ္စည်းတွေလဲတော့မသိဘူး။ ရေခဲပေါက်ကားတွေနဲ့ ကိုးကန့်တွေသယ်သွားတာ ကွတ်ခိုင်ဘက်ကို”
သိန္နီမြို့ ကိုးကန့်တပ်တွေ ပြန်ဆုတ်ခွာမယ်လို့ သတင်းတွေ ဆက်တိုက်ကြားနေရသလို ဒီနေ့ ဇူလိုင် ၂၉ ရက်မှာ ကားအစီးရေ ၆ စီးဝန်းကျင်နဲ့ ကွတ်ခိုင်ဘက်သို့ ပစ္စည်းအပြောင်းအရွှေ့တွေလုပ်တာ တွေ့ရတယ်လို့ဆိုပါတယ်။
အချို့သတင်းဌာနတွေမှာတော့ ကိုးကန့်တပ်ဘက်က ကွတ်ခိုင်ကနေ တားမိုးညဲ၊ သိန္နီကနေ ကွမ်းလုံဘက်ကို ပစ္စည်းတွေပြောင်းရွှေ့နေတယ်လို့ ရေးသားနေကြပါတယ်။
ပြန်ဆုတ်ခွာတော့မယ်လို့ သတင်းတွေထွက်ပေါ်နေတဲ့အချိန်မှာပဲ သိန္နီဈေးဟောင်းအနီးမှာ MNDAA က ဆေးရုံဆောက်ဖို့ ပြင်ဆင်နေတယ်လို့ နောက်ထပ်ဒေသခံတစ်ဦးက ပြောပါတယ်။
“ဆေးရုံဆောက်ဖို့က သေချာသလောက်ဖြစ်တယ်။ ဘာလို့လဲဆိုတော့ သူတို့ အခမ်းအနားတောင်လုပ်နေပြီ။ အခမ်းအနားကို ဒေသခံတွေကိုတော့ မဖိတ်ဘူး။ တရုတ်တွေများတယ်။ ဘာလဲတော့မသိဘူး။ ဆောက်လည်းမဆောက်ရသေးဘူး။ ဆောက်ဖို့ပွဲတော့ လုပ်နေတယ်”
ဒီနေ့ ဇူလိုင် ၂၉ ရက်မှာပဲ ဆေးရုံဆောက်ဖို့ အုတ်မြစ်ချအခမ်းအနား ပြုလုပ်ခဲ့တယ်လို့ ကိုးကန့်က ထုတ်ပြန်ခဲ့ပါတယ်။
သိန္နီမြို့ကို ညီနောင်မဟာမိတ်သုံးဖွဲ့ ဦးဆောင်တဲ့ ၁၀၂၇ စစ်ဆင်ရေး ပထမလှိုင်းမှာ MNDAA က တိုက်ခိုက်သိမ်းပိုက်နိုင်ခဲ့တာဖြစ်ပြီး လက်ရှိမှာတော့ စစ်ကောင်စီထံ လျော်ကြေးရယူပြီး ပြန်ဆုတ်ခွာမယ်ဆိုတဲ့ သတင်းတွေ ပြန့်နှံ့လျက်ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
