ပို့လဘား၊ ဧပြီ ၃၀ ရက်၊ နမ့်ခမ်း
ရှမ်းမြောက် နမ့်ခမ်းမြို့နယ် မန်စပ်ကျေးရွာအုပ်စု မန်စပ်ရွာမှာ ဆီလီကွန်ကျောက် တူးဖော်မှုကို ဒေသခံတွေ ကန့်ကွက်ပေမဲ့ ဆက်လက် တူးဖော်နေဆဲဖြစ်တယ်လို့ ဒေသခံတွေက ရွှေဖီမြေကို ပြောပါတယ်။
ပြီးခဲ့တဲ့ ဧပြီ ၂၇ ရက်က မန်စပ်ရွာမှာ ဆီလီကွန်ကျောက် တူးဖော်မှုကို ဒေသခံတွေက ကန့်ကွက်ခဲ့ပေမဲ့ မြန်မာရွှေသီးနှံကုမ္ပဏီဘက်က လုပ်ငန်းရပ်နားတာမရှိဘဲ နေ့စဉ် ကျောက်တွေ သယ်ယူနေကြတယ်လို့ ဒေသခံတစ်ဦးက ပြောပါတယ်။
“သူတို့လုပ်ငန်းကတော့ အခုချိန်ထိလည်ပတ်နေတုန်းပါပဲ။ ရပ်နားတာလဲ မရှိဘူး။ အဲဒီကုမ္ပဏီနဲ့ အုပ်ချုပ်ရေးမှူးတို့ လက်မှတ် ထိုးပြီးနောက်မှာ သူတို့ကျောက်တင်ကားတွေနဲ့ သယ်ယူနေကြတာ။ အဲနေ့က ၃ စီး၊ ၄ စီးလား မသိဘူး သူတို့သယ်သွားတာ”
မြန်မာရွှေသီးနှံကုမ္ပဏီနဲ့ကျေးရွာအုပ်ချုပ်ရေးမှူးက ဒေသခံတွေနဲ့ ဆွေးနွေးတိုင်ပင်ထားတာမရှိဘဲ သတ္တုတူးဖော်ရေး စီမံကိန်းကို ဆက်လက် တူးဖော်ဖို့ ပြီးခဲ့တဲ့ ဧပြီ ၁၂ ရက်မှာ နှစ်ဦးသဘောတူညီချက်စာချုပ်ကို လက်မှတ် ရေးထိုးခဲ့တာလို့ ပြောပါတယ်။
မြန်မာရွှေသီးနှံကုမ္ပဏီဟာ မန်စပ်ရွာအတွက် ဘာမှလုပ်ပေးတာမရှိဘဲ ကျောက်ကိုသာ အလွန်အကျွံ တူးဖော်နေကြတယ်လို့ နောက်ထပ် ဒေသခံတစ်ဦးက ပြောပါတယ်။
“ရွာထဲမှာ ကျောက်ရောမြေလမ်း ခင်းပေးမယ်လို့တော့ ပြောတယ်။ ဒေသခံတွေက အဲကိစ္စနဲ့ပတ်သက်ပြီး သဘောမတူဘူးပေါ့နော်။ ဘာလို့လဲဆိုတော့ သူတို့လက်မှတ်ထိုးတဲ့အချိန် ဒေသခံတွေရဲ့ဆန္ဒမှ မပါတာ။ သူတို့လုပ်ချင်ရာပဲ လုပ်နေတော့လေ”
မန်စပ်ရွာမှာရှိတဲ့ ကော်မတီအဖွဲ့ဝင်နဲ့ ဒေသခံတွေက ဆီလီကွန်ကျောက် ဆက်လက် တူးဖော်တာ ရပ်တန့်ပေးဖို့ ကုမ္ပဏီထံ အကြိမ်ကြိမ် စာပေးပို့ခဲ့ပေမဲ့ ကုမ္ပဏီဘက်က ဒေသခံတွေရဲ့ တောင်းဆိုချက်ကို လာရောက် ဖြေရှင်းပေးတာ မရှိခဲ့ဘူးလို့ ပြောပါတယ်။
ပြီးခဲ့တဲ့ ၂၀၂၄ ခုနှစ် ဒီဇင်ဘာ ၃၁ ရက်မှာ ကုမ္ပဏီရဲ့ လုပ်ငန်းလိုင်စင်သက်တမ်းကုန်ဆုံးခဲ့ပေမဲ့ ကုမ္ပဏီက လုပ်ငန်း ရပ်ဆိုင်းတာမရှိဘဲ ဆီလီကွန်ကျောက်ကို အလွန်အကျွံ ထုတ်ယူပြီး တရုတ်နိုင်ငံသို့ တင်ပို့ရောင်းချခဲ့တယ်လို့ ဆိုပါတယ်။
