မြတ်နိုး၊ ဧပြီ ၁၉ ရက်၊ ပူတာအို
ကချင်ပြည်နယ် ပူတာအိုမြို့နယ် မူလာဒီရွာမှာ ဧပြီ ၁၆ ရက်ကနေ မနေ့ ၁၈ ရက်အထိ တောရိုင်းဆင်တစ်ကောင် သောင်းကျန်းလို့ သေဆုံးသူ ဒေသခံ ၅ ဦးအထိ ရှိလာပြီဖြစ်ကြောင်း ဒေသခံတွေဆီက သိရပါတယ်။
“မနေ့ ဧပြီလ ၁၈ ရက်နေ့ကလည်း နောက်ထပ်တစ်ယောက် သတ်ခံရတယ် ပြောတယ်။ အခုက အဲဒီဆင် သောင်းကျန်းလို့ ဆင် အသတ်ခံရတဲ့သူက ၅ ယောက်တောင် ရှိသွားပြီလေ။ မနေ့ကအထိ အဲဒီဆင်ကို မသတ်နိုင်သေးဘူး” လို့ ဒေသခံ လူငယ်တစ်ဦးက ပြောပါတယ်။
ဆင် နင်းခံရပြီး သေဆုံးသွားသူတွေဟာ လူပြားတဲ့အထိ နင်းခံခဲ့ကြရတယ်လို့ ဆိုပါတယ်။
“မူလာဒီရွာခံတွေ ဖက်ရွက် ရှာကြရင်း ဆင်တစ်ကောင်နဲ့ တွေ့ရာကနေ နင်းသတ်ခံရတာ။ တစ်ယောက်က ကြောက်လို့ ဆုံးသွားတာ။ ကျန်တာတော့ နင်းခံရတာ” လို့ နောက်ထပ် ဒေသခံတစ်ဦးက ပြောပါတယ်။
ဧပြီ ၁၆ ရက်က အမျိုးသမီးတစ်ဦး၊ ၁၇ ရက်နေ့က အမျိုးသမီး ၂ ဦး နင်းသတ်ခံရဝာာဖြစ်ပြီး မိခင်တစ်ဦးကတော့ ကြောက်လန့်ပြီး သေဆုံးသွားတာလို့ ဆိုပါတယ်။
အဲဒီ သောင်းကျန်းနေတဲ့ဆင်ကို သတ်ပေးဖို့ နယ်မြေခံ လက်နက်ကိုင်တွေကို အကူအညီတောင်းထားပေမဲ့ လက်ရှိအထိ ကူညီဖြေရှင်းပေးတာ မရှိသေးဘူးလို့ ဒေသခံတွေက ပြောပါတယ်။
