မိုင်းရူပ၊ မတ်လ ၂၈ ရက်၊ နန်းပန်
ရှမ်းတောင် ညောင်ရွှေမြို့နယ် နန်းပန်မြို့မှာ ငလျင်ဘေးကြောင့် သေဆုံးသူ ၃၇ ဦးအထိ ရှိလာပြီး အရေးပေါ်အကူအညီ လိုအပ်နေတယ်လို့ ကယ်ဆယ်ရေး လုပ်ပေးနေသူတစ်ဦးက ရွှေဖီမြေကို ပြောပါတယ်။
ဒီနေ့ မတ်လ ၂၈ ရက် ညနေ ၅ နာရီခွဲအထိ ရရှိထားတဲ့ စာရင်းအရ ကလေးငယ်အပါအဝင် သေဆုံးသူ ၃၆ ဦးအထိ ရှိနေပြီး နေအိမ်အများစုလည်း ပျက်စီးသွားတာကြောင့် အရေးပေါ်အကူအညီ လိုအပ်နေပါတယ်။
“သေတဲ့သူက ၃၆ ယောက်ရှိပြီ။ ဒီတစ်ခါ အဆိုးဆုံးပဲ။ ရွာတွေ ခပ်များများမှာ အိမ်တွေ တော်တော်များများ ပျက်စီးသွားတယ်။ အခုလောလောဆယ် နန်းပန်ဈေးထဲက ဆိုင်ခန်းတွေမှာ နေ နေကြတယ်။ အကူအညီတော့ လာတာ မရှိသေးဘူး” လို့ ကူညီကယ်ဆယ်ရေး လုပ်ပေးနေသူ အမျိုးသားတစ်ဦးက ရွှေဖီမြေကို ပြောပါတယ်။
သေဆုံးသူတွေရဲ့ အလောင်းကို နန်းပန်ဆေးရုံမှာ လာရောက် ပို့ဆောင်တာရှိသလို တချို့ကိုတော့ မီးသဂြိုလ်ဖို့ ပြင်ဆင်နေတယ်လို့ သူက ဆက်ပြောပါတယ်။
ဒီနေ့လယ် ၁ နာရီဝန်းကျင်ကစပြီး နိုင်ငံတဝန်းမှာ ငလျင်လှုတ်ခတ်မှု ဖြစ်ပွားခဲ့ပြီး သေဆုံးသူ ရာနဲ့ချီ ရှိနေပြီးတော့ နေအိမ်အပါအဝင် ဘာသာရေးအဆောက်အအုံတွေလည်း ပျက်စီးခဲ့ပြီး အရေအတွက် အတိအကျကိုတော့ မသိရသေးပါဘူး။
ငလျင်ကြောင့် ထိခိုက်မှုများတဲ့ မန္တလေး၊ စစ်ကိုင်း၊ မကွေး၊ ပဲခူးတိုင်းနဲ့ ရှမ်းပြည်နယ် အရှေ့မြောက်ပိုင်းနဲ့ နေပြည်တော်ကောင်စီနယ်မြေကို စစ်ကောင်စီရဲ့ အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီက အရေးပေါ်အခြေအနေ ကြေညာထားပါတယ်။
ဒါ့အပြင် ငလျင်လှုပ်ခတ်ပြီး နောက်ထပ် ၆ နာရီအတွင်း ငလျင်ငယ် ဆက်လက် လှုပ်လာနိုင်တာကြောင့် လူထုတွေအနေနဲ့ ဘေးလွတ်ရာ တိမ်းရှောင်ကြဖို့ စစ်ကောင်စီက တိုက်တွန်းထားပါတယ်။
