မိုင်းရူပ၊ မတ်လ ၃၁ ရက်၊ ညောင်ရွှေ
ရှမ်းတောင် ညောင်ရွှေမြို့နယ် အင်းလေးဒေသမှာ ငလျင်ကြောင့် သေဆုံးသူ ၉၀ နီးပါး ရှိလာပြီး နေအိမ်ပေါင်း ၂ ထောင်ကျော်လည်း ပျက်စီးခဲ့တယ်လို့ ပအိုဝ်းလူငယ်အစည်းအရုံး- PYO ရဲ့ စာရင်းအရ သိရပါတယ်။
ငလျင်ဘေးကြောင့် ရေပေါ်က ကျေးရွာတွေမှာ ထိခိုက်သေဆုံးမှု များပြီး မနေ့ မတ်လ ၃၀ ရက်အထိ PYO က ရရှိထားတဲ့ စာရင်းအရ သေဆုံးသူ ၈၉ ဦးနဲ့ နေအိမ်ပေါင်း ၂,၃၃၇ လုံး ထိခိုက်ပျက်စီးခဲ့ပါတယ်။
နေအိမ်တွေ ပျက်စီးသွားတာကြောင့် ဒေသခံတွေဟာ နန်းပန်မြို့ပေါ်ရှိ နောင်ကန်ဘုန်းကြီးကျောင်းအပါအဝင် နီးစပ်ရာနေရာတွေမှာ နေထိုင်ကြရပြီး အကူအညီ လိုအပ်နေတယ်လို့ အင်းလေးဒေသမှာ ကူညီကယ်ဆယ်ရေး လုပ်ပေးနေတဲ့ အမျိုးသားတစ်ဦးက ရွှေဖီမြေကို ပြောပါတယ်။
“ကြာတော၊ ကေလာ၊ ဇရပ်ကြီး၊ သလဲဦးအင်းက အဆိုးဆုံးပဲ။ ရွာအလိုက် ပျက်ကုန်တာ။ ၄ ရွာပေါင်းရင် ပျက်စီးတဲ့အိမ်က ၁ ထောင်ကျော်တယ်။ လာကူပေးတဲ့အဖွဲ့တွေတော့ ရှိတယ်။ လုံလောက်မှုတော့ မရှိဘူး”
ပြီးခဲ့တဲ့ မတ်လ ၂၈ ရက်က မန္တလေးမြို့ အရှေ့မြောက်ဘက် ၁၂ မိုင်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ဟာ ပြင်းအား ၇.၇ အဆင့်ရှိပြီး မန္တလေး၊ နေပြည်တော်၊ စစ်ကိုင်းနဲ့ ရှမ်းတောင်မှာ သေဆုံး ဒဏ်ရာရသူ များခဲ့ပါတယ်။
မနေ့ မတ်လ ၃၀ ရက်အထိ DVB သတင်းဌာနက ရရှိထားတဲ့ စာရင်းအရ ငလျင်ဒဏ်ကြောင့် နိုင်ငံတဝန်းမှာ သေဆုံးသူ ၂ ထောင်ကျော် ရှိနေပြီ ဖြစ်ပါတယ်။
စစ်ကောင်စီတပ်ဘက်ကတော့ မတ်လ ၃၀ ရက်အထိ နိုင်ငံတစ်ဝန်းမှာ ငလျင်ကြောင့် ထိခိုက်သေဆုံးသူ ၁,၇၀၀ ကျော်နဲ့ ဒဏ်ရာရသူ ၃,၄၀၀ ကျော် ရှိကြောင်း စစ်ကောင်စီရဲ့ ပြောခွင့်ရသူ ဗိုလ်ချုပ် ဇော်မင်းထွန်းက ပြောပါတယ်။
