အိုက်ပွီး၊ ဇူလ်ုင်လ ၁၃ရက်၊ ရိဒ်
ချင်းပြည်နယ်၊ ဖလမ်းမြို့နယ်၊ ရိဒ်ခေါဒါရ်မြို့ကနေ ချင်းအမျိုးသားအဖွဲ့ချုပ် (CNO/CNDF) တပ်ဆုတ်သွားပြီး စစ်ဘေးရှောင်တွေ နေရပ်ပြန်လာကြပြီလို့ ဒေသခံတွေက ရွှေဖီမြေသို့ ပြောပါတယ်။
မီဇိုရမ်အစိုးရရဲ့ Adyocacy Group for Peace ကြားဝင်ညှိနှိုင်း ရလဒ်မထွက်ခင် ဘာအတွက်ကြောင့် မသိရဘဲ ဇူလိုင်လ ၁၁ ရက်နေ့မနက်အစောပိုင်းက ရိဒ်ခေါဒါရ်မြို့မှ CNDF တပ်ပြန်ဆုတ်သွားတာဖြစ်ပါတယ်။
ရိဒ်ခေါဒါရ်မြို့ကနေ CNDF တပ်ပြန်ဆုတ်ပြီးနောက် မနေ့ ဇူလိုင်လ ၁၂ ရက်နေ့မနက်မှာ တိုက်ပွဲတွင်း မီဇိုရမ်ပြည်နယ်ဘက် ထွက်ပြေးတိမ်းရှောင်နေကြတဲ့ ဒေသခံပြည်သူ ထောင်နဲ့ချီဟာ နေရပ်ပြန်လာကြပြီဖြစ်တယ်လို့ သိရပါတယ်။
“အိန္ဒိယဘက် ထွက်ပြေးတုန်းက အာသံရိုင်ဖယ်အဖွဲ့တွေဆီ စာရင်းပေးသွင်းတဲ့သူတွေ မနေ့မနက်မှာ ပိတ်ထားတဲ့ တံတားဖွင့်ပေးပြီး နေရပ်ပြန်လို့ရပါပြီ။ ထောင်နဲ့ချီပြည်သူတွေ ပြန်လာကြပြီ။ တဖြည်းဖြည်းနဲ့ပြန်လာသူတွေ ပိုများလာပါတယ်။”လို့ ရိဒ်ခေါဒါရ်မြို့ခံတစ်ဦးက ရွှေဖီမြေသို့ ပြောပါတယ်။
ရိဒ်-ဇိုခေါထာရ် နယ်စပ်တံတားကို အိန္ဒိယ အာသံရိုင်ဖယ်တပ်တွေက ပြန်ဖွင့်ပေမယ့် အရေးပေါ် ကျန်းမာရေးအခြေအနေကလွဲပြီး မြန်မာပြည်ဘက်က အိန္ဒိယဘက်သို့ အဝင် လက်မခံသေးပါဘူး။
CNDF တပ်ပြန်ဆုတ်ပြီးနောက် ရိဒ်ခေါဒါရ်မြို့မှာ CDF-Hualngo က မနေ့ ဇူလိုင်လ ၁၁ ရက်နေ့က မြို့ထဲ ပြန်လည်ဝင်ရောက်ပြီး လိုအပ်တဲ့ နယ်မြေရှင်းလင်းရေး လုပ်ငန်းတွေ စတင်ဆောင်ရွက်ပေးနေတယ်လို့ သိရပါတယ်။
“လောလောဆယ် တိုက်ပွဲတွင်း ပျက်စီးသွားတာတွေ ဝိုင်းဝန်းပြီး နယ်မြေရှင်းလင်းရေးတွေ ဆောင်ရွက်နေတယ်။ အခြေအနေက ဘာမှန်းမသိသေးတော့ ပြည်သူတွေ ညမထွက်ကြဖို့လည်း ညွန်ကြားထားတယ်။ မနက်ဖြန်အစည်းဝေး လုပ်မယ်လို့ ကြားတယ်။”လို့ ရိဒ်ခေါဒါရ်မြို့ခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ ဇူလိုင်လ ၅ရက်နေ့ မနက်က ဖြစ်ပွားခဲ့တဲ့ CDF-Hualngo နဲ့ CNDF တို့ တိုက်ပွဲကြောင်း ဒေသခံပြည်သူ သုံးထောင်ကျော်ဟာ အိန္ဒိယ၊ မီဇိုရမ်ပြည်နယ်ဘက် ထွက်ပြေးတိမ်းရှောင်နေရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
