ခိုင်လေး၊ ဖေဖော်ဝါရီ ၁၂ ရက်၊ ဟားခါး
ချင်းပြည်နယ် ဟားခါး-ထန်တလန်ကြား ခြေကုပ်ယူထားတဲ့ ပွိုင့် ၃ စခန်းမှ စစ်မှုထမ်းဥပဒေကြောင့် တပ်သားသစ်အဖြစ် ဖမ်းဆီးစုဆောင်းခံထားရတဲ့ စစ်သား ၄ ဦးဟာ လက်နက်ခဲယမ်းအပြည့်အစုံနဲ့အတူ ချင်းအမျိုးသားတပ်မတော်- CNF/CNA ထံ အလင်းဝင်ရောက်ခဲ့တယ်လို့ Chinland Information Center က ဖေဖော်ဝါရီ ၁၀ ရက်မှာ ထုတ်ပြန်ပါတယ်။
ပြီးခဲ့တဲ့ ဖေဖော်ဝါရီ ၅ ရက်က CNA ထံ လက်နက် ၃ လက်၊ ခဲယမ်းအပြည့်အစုံနဲ့ အလင်းဝင်လာတာဖြစ်ပြီး CNA ဘက်က လက်နက် ၁ လက်ကို သိန်း ၅၀ ကျပ် ဆုငွေ ချီးမြှင့်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
Chinland Information Center မှ တာဝန်ရှိသူတစ်ဦးက “အခု ၄ ယောက်ကတော့ တစ်ပြိုင်တည်း ဝင်လာတာပါ။ လက်ရှိမှာတော့ သူတို့ကို စခန်းမှာပဲ နေခိုင်းပြီး သူတို့သဘောအရ နယ်စပ်ဘက်ကို ပို့ရင်လဲ ပို့မှာပါ။ စခန်းအတွင်းမှာပဲ ကူညီနိုင်တာ ရှိရင်လဲ သူတို့သဘောအရ ကူညီပြီး နေခိုင်းမှာပါ” လို့ ပြောပါတယ်။
ဒီနေ့အထိ CNA ထံ အလင်းဝင်လာတာ အယောက် ၉၀ ကျော်အထိ ရှိလာပြီး ဝင်လာတဲ့သူတွေကို ပုံမှန်အားဖြင့်တော့ India နယ်စပ်ဘက် ပို့ဆောင်ပေးတာ ရှိတယ်လို့ ဆိုပါတယ်။
“ကျနော်တို့က အတင်းအဓမ္မ တပ်ထဲ ထည့်ခံရတာဖြစ်တယ်။ အိမ်အထိ လာပြီး ခေါ်တာပါ။ တစ်ယောက်ကတော့ ဆိုင်ကယ် Accident ဖြစ်ရာကနေ စစ်မှုမထမ်းမနေရ ဉပဒေကြောင့် စစ်တပ်ထဲ အသွင်းခံရတာဖြစ်တယ်” ဆိုပြီး အလင်းဝင်လာသူတစ်ဦးက ပြောပါတယ်။
စစ်သင်တန်းကို ၂ လကျော်သာ တက်ခိုင်းကာ သေနတ်တစ်ချက်မှ မပစ်ရသေးဘဲ ရှေ့တန်း ပို့ခံရတာလို့ ဆိုပါတယ်။
ဟားခါးအနီး ပွိုင့် ၃ စခန်းမှာ ၎င်းတို့လို အယောက် ၁၀၀ နီးပါး ရှိနေပြီး အားလုံးက ထွက်ပြေးချင်နေပေမဲ့ စစ်တပ်ဘက်မှ အမျိုးမျိုး ခြိမ်းခြောက်တဲ့အတွက် ထွက်မပြေးရဲကြဘူးလို့ CIC မှ တာဝန်ရှိသူက ဆက်ပြောပါတယ်။
ဟားခါးနဲ့ ထန်တလန်မြို့ကြားက စစ်ကောင်စီတပ်စခန်းတွေကို CNA ဦးဆောင်တဲ့ ပူးပေါင်းအဖွဲ့က ပြီးခဲ့တဲ့ ၂၀၂၄ ခုနှစ် ဒီဇင်ဘာ ၈ ရက်မှာ သိမ်းပိုက်ထားတာ ဖြစ်ပါတယ်။
စစ်တပ်ဘက်ကလည်း ၎င်းတို့ လက်လွှတ်ထားရတဲ့ ဟားခါး-ထန်တလန်ကြားက တပ်စခန်းတွေကို ပြန်လည် ထိုးစစ်ဆင် တိုက်ခိုက်နေတာတွေလည်း ရှိနေပါတယ်။
