အိုက်ပွီး၊ အောက်တိုဘာ ၁၉ ရက်၊ ကလေး
စစ်ကိုင်းတိုင်း၊ ကလေးမြို့နယ် ကလေး-ခမ်းပတ် ကားလမ်းမ စစ်ကြောင်းထိုးလာတဲ့ စစ်ကောင်စီ အင်အား ၁,၀၀၀ ခန့်နဲ့ ဒေသခံကာကွယ်ရေးတပ်တို့ ရာဇဂြိုလ်ကျေးရွာအနီးမှာ တိုက်ပွဲဖြစ်ပွားနေတယ်လို့ ဒေသခံတွေဆီက သိရပါတယ်။
ကလေးမြို့ကနေ စစ်ကြောင်းထိုးလာတဲ့ စစ်ကောင်စီ စစ်ကြောင်းဟာ မနေ့ အောက်တိုဘာ ၁၇ ရက်နေ့ညနေမှာ ရာဇဂြိုလ်ရွာအနီးမှာ စတင်ထိတွေ့မှုဖြစ်ပြီး ရွာမီးရှို့ခံရကာ အရပ်သား ၃ ဦး ထက်မနည်း ဖမ်းဆီးခံရတယ်လို့ သိရပါတယ်။
“ကလေးမြို့ကနေ ကလေး-ခမ်းပတ် ကားလမ်းကို စစ်ကြောင်း ထိုးလာတဲ့ စစ်ကောင်စီနဲ့ မနေ့က ထိတွေ့မှုဖြစ်တာပါ။ စစ်ကောင်စီဘက်က အင်အားအတော်များပါတယ်။ တစ်ထောင်ဝန်းကျင်လောက်ရှိမယ်။ တိုက်ပွဲဖြစ်ပြီး ရာဇဂြိုလ်ရွာကိုလည်း မနေ့က မီးရှို့သွားတယ်။ ရွာသား သုံးဦးကိုလည်း ဖမ်းဆီးသွားပါတယ်။”လို့ ကလေးဒေသခံတစ်ဦးက ရွှေဖီမြေသို့ ပြောပါတယ်။
တိုက်ပွဲကြောင်း ရာဇဂြိုလ်ရွာက ထောင်နဲ့ ချီပြည်သူတွေဟာ ဘေးလွတ်ရာကို ထွက်ပြေးတိမ်းရှောင်နေရပါတယ်။
လက်ရှိ ကလေးမြို့ကနေ ကလေး-ခမ်းပတ် ကားလမ်းကို စစ်ကြောင်းထိုးလာတဲ့အတွက် ကားလမ်းတလျှောက် ရွာသားတွေနဲ့ တော်လှန်ရေးတပ်ဖွဲ့တွေထိန်းချုပ်ထားတဲ့ ခမ်းပတ်မြို့ခံတွေလည်း တိမ်းရှောင်နေကြတယ်လို့ သိရပါတယ်။
“တစ်နိုင်ငံလုံး စစ်သားတွေ ကလေးဘက်လာစုနေသလိုပဲ။ စစ်သားတွေအများကြီးနဲ့ စစ်ကြောင်း ထိုးလာတာ။ နေရာစုံကနေ စစ်ကြောင်းထိုးလာတော့ အရပ်သားတွေက ပိတ်မိနေတဲ့သဘောပါ။ အခုဆို ကားလမ်းတလျှောက် ရွာသားတွေအကုန်လုံး တိမ်းရှောင်နေရတယ်။ ခမ်းပတ်မြို့ကလူတွေလည်း တိမ်းရှောင်နေကြပြီး။”လို့ ကလေးဒေသခံတစ်ဦးက ရွှေဖီမြေသို့ ပြောပါတယ်။
ကလေးမြို့က စစ်ကြောင်းထိုးလာတဲ့ စစ်ကောင်စီစစ်ကြောင်းဟာ ဒီကနေ့ အောက်တိုဘာ ၁၈ ရက်နေ့မှာ တမူးမြို့နယ်ကျေးရွာတွေနဲ့ ခမ်းပတ်မြို့နယ်တွေမှာ ရောက်ရှိနေပြီလို့ သိရပါတယ်။
စစ်ကြောင်းထိုးရာ လမ်းတလျှောက်မှာ ရွာသားတချို့ ဖမ်းဆီးသတ်ဖြတ်မှုတွေလည်းလုပ်ဆောင်နေပြီး ကလေးမြို့နယ်၊ အနောက်ခုံရွာသားတချို့ ဖမ်းဆီးသတ်ဖြတ်ခံရတယ်လို့ စုံစမ်းသိရှိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
