အလင်း၊ ဖေဖော်ဝါရီ ၂၁ ရက်၊ ဟားခါး
ချင်းပြည်နယ်မြို့တော် ဟားခါးမှာ ဒုတိယ ဗိုလ်ချုပ်ကြီး ရာပြည့် တက်ရောက်တဲ့ ချင်းအမျိုးသားနေ့ အခမ်းအနား ဒရုန်းနဲ့ တိုက်ခိုက်ခံရပြီး အရေးပေါ် ထွက်ပြေးခဲ့ရတယ်လို့ ချင်းကာကွယ်ရေးတပ်(ဟားခါး)က ဖေဖော်ဝါရီ ၂၀ ရက်နေ့ ထုတ်ပြန်ပါတယ်။
စစ်ကောင်စီ ဦးဆောင်ပြီး မနေ့ ဖေဖော်ဝါရီ ၂၀ ရက် နေ့မှာ ဟားခါးမြို့ရှိ မြို့နယ်နဲ့ ခရိုင်စုပေါင်းရုံးရှေ့မှာ ကျင်းပပြုလုပ်တဲ့ (၇၈) နှစ်မြောက် ချင်းအမျိုးသားနေ့ အခမ်းအနားကို ဒုတိယဗိုလ်ချုပ်ကြီး ရာပြည့်အပါအဝင် အရာရှိကြီး ၁၇ ဦး တက်ရောက်ခဲ့ပါတယ်။
အဲဒီစစ်ကောင်စီ ကျင်းပတဲ့ အခမ်းအနားကို CDF-Hakha က FPV Suicide Drone တွေကို အသုံးပြု၍ အခမ်းအနားကျင်းပရာ နေရာကို တိုက်ခိုက်ခဲ့တာ ဖြစ်ပါတယ်။
တိုက်ခိုက်မှုကြောင့် ကျင်းပနေတဲ့ အခမ်းအနားမှာ မရှုမလှ ပျက်စီးသွားခဲ့ပြီး သုံးရက်ကြာ နေထိုင်ဖို့ စီစဉ်ထားတဲ့ ဗိုလ်ချုပ်ကြီး ရာပြည့်ဟာ အစီစဉ်တွေအားလုံး ဖျက်သိမ်းကာ ချင်းပြည်နယ်အတွင်းမှ အရေးပေါ် ပြန်လည်ထွက်ခွါသွားခဲ့ရပါတယ်။
“စုပေါင်းရုံးမှာ ကျင်းပတဲ့ ချင်းအမျိုးသားနေ့ တိုက်ခိုက်ခံရတာ နေ့လယ်လောက်မှာပါ။ ထိခိုက်မှုတော့ မကြားမိဘူး။ အရာရှိတွေက ဒရုန်းတွေနဲ့ တိုက်ခိုက်ခံရပြီးနောက် ထွက်ပြေးနေရတယ်။ ပြည်ထောင်စုအဆင့် တက်ရောက်တဲ့သူတွေက ညနေပိုင်းလေယာဥ်နဲ့ချက်ချင်း ဟားခါးကနေ ထွက်ခွာကြတယ်။ ပွဲက ဆက်ကျင်းပနေသလိုပါပဲ။ စစ်တပ်နဲ့ မလွတ်မကင်းတဲ့သူတွေပဲ တက်ရောက်ကြတာ။”လို့ ဟားခါးမြို့ခံတစ်ဦးက ရွှေဖီမြေသို့ ပြောပါတယ်။
အခမ်းအနားကို စစ်ကောင်စီတပ်ရဲ့ လက်အောက်ခံ NonCDM ဝန်ထမ်းတွေအပြင် ဝန်ကြီး ဦးကောလ်လျန်ထန်းနဲ့ ဆက်နွှယ်နေတဲ့ တင်ဒါအခွင့်ထူးခံ ကုမ္ပဏီ ၄၂ ခုမှ တာဝန်ရှိသူများလည်း တက်ရောက်ခဲ့ကြတယ်လို့ သိရပါတယ်။
“နောက်နောင်လည်း စစ်ကောင်စီရဲ့ လုပ်ငန်းလည်ပတ်မှုမှာ ကျောထောက် နောက်ခံပြုနေတဲ့ မည်သူမဆိုကို စစ်ရေးအရ ထိရောက်စွာ ဆက်လက်အရေးယူ ဆောင်ရွက်သွားမယ်” လို့ CDF-Hakha က ပြင်းထန်စွာ သတိပေးထားပါတယ်။
စစ်ကောင်စီတပ် ကျင်းပတဲ့ ချင်းအမျိုးသားနေ့ဟာ ချင်းပြည်သူလူထုရဲ့ သမိုင်းဂုဏ်သိက္ခာနဲ့ ကိုယ်ပိုင်အခွင့်ရေးတွေကို ဖျက်ဆီးချိုးဖောက်နေတဲ့ လုပ်ရပ်သာဖြစ်တယ်လို့ CDF-Hakha က ဖေဖော်ဝါရီ ၁၇ ရက်နေ့က ထုတ်ပြန်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
