အိုက်ပွီး၊ အောက်တိုဘာ ၁၆ ရက်၊ ဟားခါး
ချင်းပြည်နယ် ဟားခါးမြို့က ပြည်နယ်ရဲစခန်းကို ချင်းကာကွယ်ရေးတပ်ဖွဲ့တွေက စီးနင်းပြီး စစ်ကောင်စီတပ်ဖွဲ့ဝင် ၆ ဦးသေဆုံးကာ အချုပ်သား ၁၅ ဦးကို ကယ်ထုတ်နိုင်ခဲ့တယ်လို့ ချင်းကာကွယ်ရေးတပ်ဖွဲ့ဝင်တွေဆီက သိရပါတယ်။
လုံခြုံရေးအများပြား တင်းကျပ်ထားတဲ့ ဟားခါးမြို့က ပြည်နယ်ရဲစခန်းကို ဒီနေ့ အောက်တိုဘာ ၁၆ ရက် မနက် ၃ နာရီခန့်မှာ ချင်းကာကွယ်ရေးတပ်ဖွဲ့တွေက ဝင်ရောက်စီးနင်းခဲ့ပြီး တစ်နာရီခွဲကြာထိ တိုက်ပွဲဖြစ်ပွားခဲ့ပါတယ်။
“ကျနော်တို့ ရဲစခန်း ဝင်စီးတာ မနက် ၃ နာရီလောက်မှာ ဖြစ်တယ်။ မနက် ၄ နာရီခွဲလောက်မှာ ပစ်ခတ်မှုရပ်ပြီး တပ်ပြန်ဆုတ်တယ်။ တစ်နာရီခွဲလောက် ပစ်ခတ်မှုဖြစ်တယ်။” လို့ ချင်းကာကွယ်ရေးတပ်ဖွဲ့ဝင်တစ်ဦးက ရွှေဖီမြေသို့ ပြောပါတယ်။
အဲဒီ ပစ်ခတ်မှုမှာ စစ်ကောင်စီတပ်ဘက်က ၆ ဦး သေဆုံးပြီး အများအပြား ထိခိုက်ဒဏ်ရာရကာ လက်နက်ခဲယမ်းတချို့လည်း သိမ်းဆည်းရမိခဲ့တယ်လို့ သိရပါတယ်။
ဒါ့အပြင် ပြည်နယ်ရဲစခန်းမှာ အချုပ်ကျနေတဲ့ တော်လှန်ရေးတပ်ဖွဲ့ဝင် ၅ ဦးအပါအဝင် အချုပ်သား ၁၅ ဦးကိုလည်း ကယ်ထုတ်နိုင်ခဲ့တယ်လို့ သိရပါတယ်။
“တိုက်ပွဲအပြီးမှာ အချုပ်သား ၁၅ ဦးကို ကယ်ထုတ်နိုင်ခဲ့ပါတယ်။ အဲထဲမှာ တော်လှန်ရေး ရဲဘော် ၅ ယောက်လည်းပါတယ်။ တခြားအချုပ်သားတွေက နိုင်ငံရေးအကျဥ်းသားတွေပါမပါ လောဆယ် မသိရသေးဘူး။” လို့ ချင်းကာကွယ်ရေးတပ်ဖွဲ့ဝင်တစ်ဦးက ရွှေဖီမြေသို့ ပြောပါတယ်။
ဒီနေ့မနက် တိုက်ပွဲမှာ ချင်းကာကွယ်ရေးတပ် (ဟားခါး) ရဲဘော်တစ်ဦး ကျဆုံးခဲ့ပါတယ်။
စစ်ကောင်စီက ဒီနေ့မနက်ကစပြီး ဟားခါးမြို့အနီးအနား ကျေးရွာတွေမှာ လက်နက်ကြီးကျည်တွေ ရမ်းသမ်းပစ်ခတ်နေတယ်လို့ ဒေသခံတွေဆီက သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
