ခိုင်လေး၊ ဧပြီ ၂ ရက်၊ သီပေါ
တအာင်းတပ်မတော်- TNLA ထိန်းချုပ်ထားတဲ့ သီပေါမြို့မှာ မြို့သိမ်းတိုက်ပွဲအတွင်း လက်နက်ကြီးကြောင့် နေအိမ် ထိခိုက်ပျက်စီးသွားတဲ့ ဒေသခံတွေကို လူမှုရေးအဖွဲ့များမှ လှူဒါန်းထားတဲ့ ငွေတွေအသုံးပြုပြီး နှလုံးသား ပရဟိတအဖွဲ့က ၎င်းတို့ကိုယ်စား သွားရောက် လှူဒါန်းပေးခဲ့တယ်လို့ သိရပါတယ်။
မီးလောင်ပျက်စီးသွားတဲ့ အိမ်တစ်အိမ်ကို ၄ သိန်းကျော် (၄၃၇,၀၀၀ ကျပ်) ထောက်ပံ့ပေးတာလို့ နှလုံးသား ပရဟိတအဖွဲ့ခေါင်းဆောင် ကိုနေဇော်ထွန်းက ရွှေဖီမြေကို ပြောပါတယ်။
”သွားလှူတဲ့နေရာတွေက တုံစင့်၊ ဇာတ်စု၊ နားမှုံ ကျောင်းစု။ အခုလည်း အဲနေရာတွေထဲမှ ထောက်ပံ့မှု မရသေးတဲ့သူတွေကို လှူတာပါ။ အရင်က တစ်အိမ်ထောင်ကို ၃ သိန်း ၁ သောင်း ထောက်ပံ့ပေးတာ ရှိတယ်။ အခုတစ်ခေါက် လှူမှာက အိမ်ခြေ ၂၀၀ ပါ။ ၈ အိမ် လှူပြီးပြီ”
နားမှုံရွာက အိမ်ထောင်စု ၈ ခုကို ဒီနေ့ ဧပြီ ၂ ရက်မှာ လှူဒါန်းပေးခဲ့တာဖြစ်ပြီး ကျန်ရှိနေသေးတဲ့ တုံစင့်ရွာနဲ့ မြို့ပေါ် ရပ်ကွက်တချို့မှ နေအိမ် ပျက်စီးသွားတဲ့ ဒေသခံတွေအတွက် သိန်း ၈၀၀ ကျော် အသုံးပြုသွားမှာလို့ ဆိုပါတယ်။
လက်နက်ကြီးကြောင့် ထိခိုက်ပျက်စီးခဲ့တဲ့ နေအိမ်တွေကိုလည်း ၂ ကြိမ် ငွေသေား ထောက်ပံ့ပေးတာ ရှိတယ်လို့ ဆိုပါတယ်။
မြို့သိမ်းတိုက်ပွဲအတွင်း ထိခိုက်ပျက်စီးသွားတဲ့ နေအိမ်အရေအတွက် အတိအကျကို မသိရပေမဲ့ ထိခိုက်ပျက်စီးတာတွေတော့ အများစု ရှိခဲ့ပါတယ်။
သီပေါမြို့ကို ၁၀၂၇ စစ်ဆင်ရေး ဒုတိယလှိုင်းအတွင်း PSLF/TNLA က ၂ လကျော်ကြာ ထိုးစစ်ဆင်တိုက်ခိုက်ပြီးနောက် မြို့ကို ထိန်းချုပ်နိုင်ခဲ့တာလည်း ဖြစ်ပါတယ်။
