ရွှေဖီမြေ၊ ဖေဖော်ဝါရီ ၂၆ ရက်၊ မင်းတပ်
ချင်းပြည်နယ် မင်းတပ်မြို့ထဲ နေထိုင်တဲ့ ဒေသခံတွေ လက်နက်ခဲယမ်းနဲ့ ဖောက်ခွဲရေးပစ္စည်းတွေ ကိုင်ဆောင်ထားတာရှိရင် နီးစပ်ရာ တပ်ရင်းတပ်ဖွဲ့တွေထံ လာရောက်အပ်နှံဖို့ ချင်းကာကွယ်ရေးတပ် (မင်းတပ်) က မနေ့ ဖေဖော်ဝါရီ ၂၅ ရက်မှာ သတိပေးချက် ထုတ်ပြန်ထားပါတယ်။
မင်းတပ် မြို့သိမ်းတိုက်ပွဲအတွင်း ထွက်ပြေးသွားတဲ့ စစ်ကောင်စီ တပ်သားတွေဆီက ရရှိထားတဲ့ လက်နက်ခဲယမ်း ဒါမှမဟုတ် တစ်ခြားတစ်နည်းနည်းနဲ့ ရရှိထားတဲ့ လက်နက်ခဲယမ်းကို လာမယ့် မတ်လ ၁၅ ရက် နောက်ဆုံးထားပြီး နီးစပ်ရာ တပ်ရင်းတွေဆီ အပ်နှံရမယ်လို့ ပြောဆိုထားပါတယ်။
ဒါ့အပြင် လာရောက် အပ်နှံတဲ့ လက်နက်ခဲယမ်းတွေဟာ ဝယ်ယူထားကြောင်း ခိုင်လုံမှုရှိတယ်ဆိုရင် လာရောက် အပ်နှံသူတွေကို သတ်မှတ်ထားတဲ့ တန်ဖိုးအတိုင်း ဆုကြေးငွေ ပြန်လည် ပေးအပ်သွားမယ်လို့ ဖော်ပြထားပါတယ်။
ဒေသခံတွေအနေနဲ့ သတ်မှတ်ထားတဲ့ရက်ထက် ကျော်လွန်ပြီး လက်နက်ခဲယမ်း ကိုင်ဆောင်တာ၊ လက်ဝယ် ထားရှိတာနဲ့ ရောင်းဝယ်ဖောက်ကားတာတွေလုပ်ရင် ပြင်းပြင်းထန်ထန် အရေးယူသွားမယ်လို့ ထုတ်ပြန်ထားပါတယ်။
မင်းတပ်မြို့ကို ပြီးခဲ့တဲ့ ၂၀၂၄ ခုနှစ် ဒီဇင်ဘာ ၂၂ ရက်မှာ CDF မင်းတပ် ပါဝင်တဲ့ ချင်းညီနောင်အဖွဲ့နဲ့ မဟာမိတ် ပူးပေါင်းအဖွဲ့တွေက အပြီးသတ် သိမ်းပိုက်နိုင်ခဲ့ပြီး ဒေသခံတွေကို မြို့တွင်း ပြန်လည် ဝင်ရောက်နေထိုင်ခွင့် ပြုလိုက်ပြီဖြစ်ကြောင်း CDF မင်းတပ်က ပြီးခဲ့တဲ့ ဖေဖော်ဝါရီ ၉ ရက်မှာ ထုတ်ပြန်ထားပါတယ်။
