အိုက်ပွီး၊ နိုဝင်ဘာ ၇ ရက်၊ ဟားခါး
ချင်းပြည်နယ် ဟားခါးမြို့နယ် Loklung ကျေးရွာရှိ ချင်းကာကွယ်ရေးတပ် (ဟားခါး)ဂိတ်ကို စစ်ကောင်စီတပ်က တိုက်ခိုက်တာကြောင့် CDF ဟားခါး ရဲဘော်တစ်ဦး ကျဆုံးခဲ့တယ်လို့ ဖြစ်စဉ်သိရှိသူ ဒေသခံတွေဆီက သိရပါတယ်။
Loklung ရွာရှိ CDF-Hakha လုံခြုံရေးဂိတ်ကို နိုဝင်ဘာ ၅ ရက် ညနေ ၅ နာရီခွဲခန့်မှာ ဟားခါးမြို့ ခလရ ၂၆၆ တပ်ရင်းမှ စစ်ကောင်စီတပ်ဖွဲ့ဝင်က အလစ်အငိုက် ဝင်ရောက်တိုက်ခိုက်ခဲ့တာပါ။
“ဟားခါးမြို့ကနေ စစ်ကောင်စီ စစ်ကြောင်းထိုးပြီး အလစ်အငိုက် တိုက်ခိုက်သွားတာပါ။ ပစ်ခတ်မှု ဖြစ်တာက ခဏလေးပါပဲ။ ပြီးရင် စစ်ကောင်စီဘက်က တပ်ပြန်ဆုတ်သွားတယ်” လို့ ဖြစ်စဉ်သိရှိသူ ဒေသခံတစ်ဦးက ရွှေဖီမြေသို့ ပြောပါတယ်။
ပစ်ခတ်မှုကြောင့် CDF ဟားခါးဘက်က ရဲဘော်တစ်ဦး ကျဆုံးခဲ့ပြီး စစ်တပ်ဘက်က ထိခိုက်မှုမရှိဘဲ ဟားခါးမြို့ဘက် တပ်ပြန်ဆုတ်နိုင်ခဲ့တယ်လို့ သိရပါတယ်။
Loklung ရွာဟာ ဟားခါး-မတူပီ ကားလမ်းပေါ်မှာရှိပြီး ဟားခါးမြို့နဲ့ ၉ မိုင်သာ ဝေးပြီးတော့ ပစ်ခတ်မှု ဖြစ်ပွားပြီးနောက် ရွာခံတွေဟာ ရွာလုံးကျွတ် ထွက်ပြေးတိမ်းရှောင်နေကြပါတယ်။
“ဒီနေ့(နိုဝင်ဘာ ၆ ရက်)မနက်တော့ ပစ်ခတ်မှု မရှိတော့ပါဘူး။ ရွာသားတွေက မနေ့ည(နိုဝင်ဘာ ၅ ရက်)ကတည်းက အကုန်ထွက်ပြေးကြတယ်။ အခု ပစ်ခံရတဲ့နေရာက ဟားခါးမြို့နဲ့ နီးတယ်။ အဲဒါကြောင့် တိုက်ခိုက်ခံရတဲ့သဘောပါ” လို့ ဖြစ်စဉ်သိရှိသူ ဒေသခံတစ်ဦးက ရွှေဖီမြေသို့ ပြောပါတယ်။
စစ်တပ်ဟာ ဒီရက်ပိုင်းမှာ မြို့အနီးအနားကျေးရွာတွေမှာ စစ်ကြောင်း ထိုးတာ၊ ဒရုန်းနဲ့ ကင်းထောက်တာတွေ လုပ်ဆောင်နေသလို မြို့ထဲမှာလည်း လုံခြုံရေး တင်းကြပ်ထားတယ်လို့ သိရပါတယ်။
ဟားခါးမြို့ဟာ စစ်တပ် ထိန်းချုပ်ထားတဲ့မြို့ဖြစ်သလို လာမယ့် ဒီဇင်ဘာလမှာ စစ်ကောင်စီက ရွေးကောက်ပွဲ ကျင်းပမယ်လို့လည်း ကြေညာထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
