အိုက်ပွီး၊ ဇူလိုင်လ ၁၀ ရက်၊ ဟားခါး
ချင်းပြည်နယ်၊ ဟားခါးမြို့နယ်အတွင်းမှာ ယင်းမာပင်ခရိုင်၊ အမှတ် (၁၅) တပ်ရင်းမှူး ထောက်ခံချက်နဲ့ ရဲဘော် ၃ ဦးတို့ သယ်ဆောင်လာတဲ့ မူးယစ်ဆေးဝါးတွေကို ချင်းကာကွယ်တပ်-ဟားခါးက ဖမ်းဆီးရမိခဲ့တယ်လို့ ထုတ်ပြန်ပါတယ်။
Hilux 9K-1693 ကား နဲ့ ကိုစိုးသူ ပိုင်ဆိုင်တဲ့ 1J- 6011 Forland ကားတွေနဲ့ ဖလမ်းမြို့နယ်၊ ဗားရ်တံတားသို့ သယ်ဆောင်လာတဲ့ မူးယစ်းဆေးဝါး ဖြစ်ပါတယ်။
ဖမ်းဆီးရမိတဲ့ မူးယစ်းဆေးဝါးတွေဟာ နံပတ်ဖိုး ဘိန်းဖြူ ၁၁၀ ကီလိုဂရမ်၊ စိတ်ကြွဆေးပြား ၃သန်းခန့်၊ မောင်းပြန်သေနတ် ၂လက်၊ mini starlink ၂ ခုနှင့်အတူ တော်လှန်ရေး ရဲဘော် ၃ ဦး၊ ယာဉ်မောင်း ၁ ဦး နှင့် စပယ်ယာ ၁ ဦးတို့ကို ဖမ်းဆီးရမိခဲ့ပါတယ်။
“ကျတော်တို့ စလင်းကြီးမြို့နယ်ထဲကနေ သယ်လာတာပါ။ ငွေသာရွာအနားကပါ။ သူတို့ အဆောက်အဦးလေးတွေ ရှိတယ်။ လူနေတဲ့ အဆောက်အဦးရယ်၊ အဲဒီပစ္စည်းတွေထားတဲ့ အဆောက်အဦးရယ်၊ အဲဒါတွေက အဖွဲ့အစည်းဟာပါ။ သူတို့ အဖွဲ့အစည်းကဟာလို့ ပြောပါတယ်။ လက်နက်ကိုင်တပ်ဖွဲ့တွေ နေပါတယ်။ ကျနော်တို့ကို ပြောတာက ယင်းမာပင်တပ်ရင်း ၁၅ လို့ပဲ ပြောပြထားပါတယ်။”လို့ CDF-Hakha ထုတ်ပြန်တဲ့ ရုပ်သံဖိုင်မှာ ကားသမား ကိုကျော်ဟိန်းက ပြောထားပါတယ်။
ဒါ့အပြင် ယင်းမာပင်ခရိုင် တပ်ရင်း ၁၅ မှ ရဲဘော်မှ ကိုဇော်နောင်ကမူကလည်း တပ်ခွဲမှူး ကိုပုတီးထံမှ သယ်ဆောင်လာတာဖြစ်ပြီး ချင်းပြည်နယ်ကို မူးယစ်ဆေးဝါး သယ်ဆောင်လာတာ ၄ ကြိမ်ရှိပြီလို့ ရုပ်သံဖိုင်မှာ ပြောဆိုထားပါတယ်။
ဖမ်းဆီးခံရသူထဲက ကျန်တစ်ဦးမှာ အမှတ် ၁ စစ်ဒေသ၊ ပခုက္ကူခရိုင် တပ်ရင်း ၁၀ က ရဲဘော် အာကာဖြိုးဖြစ်တို့ဖြစ်ပြီး ဖမ်းဆီးရမိသူတွေကို တရားဥပဒေအတိုင်း အရေးယူဆောင်ရွက်သွားမယ်လို့ CDF-Hakha က ထုတ်ပြန်ထားပါတယ်။
မူးယစ်းဆေးဝါး သယ်ယူပို့ဆောင်ရေးမှာ တာဝန်ခံဖြစ်တဲ့ မောင်ဇော်လတ် (အမည်ရင်း ဦးဝင်းမော်) နဲ့ ကိုပုတီး (အမည်ရင်း ဦးကျော်မင်းဇော်) တို့ဟာ ထွက်ပြေး တိမ်းရှောင်သွားခဲ့တယ်လို့ သိရပါတယ်။
ဖမ်းဆီးရမိတဲ့ မူးယစ်ဆေးဝါးတွေကို မနေ့ ဇူလိုင်လ ၉ ရက်မှာ CDF-Hakha က ဖမ်းဆီးရမိတဲ့ မူးယစ်းဆေးဝါးတရားခံတွေရှေ့မှာ မီးရှို့ဖျက်ဆီးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
