မိုင်းရူပ၊ ဖေဖော်ဝါရီ ၂၄ ရက်
ရှမ်းတောင်မှာ ပအိုဝ်းပြည်သူ့စစ်- PNO က ကရင်နီပြည်နယ်က အရပ်သားတွေကို ပစ်မှတ်ထား ဖမ်းဆီးသတ်ဖြတ်နေတယ်လို့ လူ့အခွင့်အရေး ချိုးဖောက်မှုတွေကို မှတ်တမ်း တင်နေတဲ့ Burma War Crime Investigation- BWCI အဖွဲ့က ပြောပါတယ်။
ဒီနေ့ ဖေဖော်ဝါရီ ၂၄ ရက်မှာ ပြုလုပ်တဲ့ BWIC ရဲ့ “မင်းတို့အသက်ပဲ လိုချင်တယ်”ဆိုတဲ့ ဆွေးနွေးပွဲမှာ BWIC ရဲ့ အစီရင်ခံစာထဲ ဖော်ပြထားပါတယ်။
ပြီးခဲ့တဲ့ ၂၀၂၄ ခုနှစ် ဖေဖော်ဝါရီလကနေ အောက်တိုဘာလအထိ ၈ လအတွင်း စစ်ကောင်စီ လက်အောက်ခံ PNO က ကရင်နီပြည်ရှိ အရပ်သား ၂၇ ဦးကို ဖမ်းဆီးပြီး ၅ ဦး သတ်ဖြတ်ခဲ့တယ်လို့ BWIC က ဆိုပါတယ်။
“ကရင်နီပြည်နယ်နဲ့ ရှမ်းပြည်နယ်တောင်ပိုင်းက ကယန်း၊ ကယားလူမျိုးတွေပါ။ ဗမာလည်း နှစ်ယောက်တော့ ပါတယ်။ အဓိက ကရင်နီ အရပ်သားတွေကို ပစ်မှတ်ထားတာပေါ့နော်” လို့ BWIC ရဲ့ ပြောရေးဆိုခွင့်ရှိသူက ရွှေဖီမြေကို ပြောပါတယ်။
PNO ရဲ့ ဖမ်းဆီးတာ ခံရတဲ့အထဲ အမျိုးသား ၂၃ ဦးနဲ့ အမျိုးသမီး ၄ ဦး ပါဝင်ကာ ၅ ဦးဟာ သတ်ဖြတ်ခံရပြီး ၈ ဦးပြန်လည် လွှတ်မြောက်လာပေမဲ့ ၉ ဦးကတော့ ပျောက်ဆုံးနေဆဲလို့ အစီရင်ခံစာမှာ ဖော်ပြထားပါတယ်။
“သေနတ် ထမ်းလို့ရရင် ထမ်းမယ်။ ကျနော်တို့ကို မသတ်ပါနဲ့လို့ ရှိခိုးတောင်းပန်၊ မျက်ရည်တွေနဲ့ တောင်းပန်ပေမဲ့လည်း မင်းတို့အသက်ပဲ လိုချင်တယ်။ မင်းတို့ ကယန်း၊ ကယား၊ ကယောလူမျိုးတွေ မမြင်ချင်ဘူး လို့ သူတို့(PNA) စစ်သားတွေက ပြောတယ်” လို့ ဖမ်းခံရပြီး ပြန်လွှတ်လာသူတစ်ဦးရဲ့ ပြောပြချက်ကို အစီရင်ခံစာမှာ ဖော်ပြထားပါတယ်။
PNO ရဲ့ ဖမ်းဆီသတ်ဖြတ်တာ ခံရတဲ့အထဲ ကရင်နီပြည်နယ် လွိုင်ကော်၊ ဒီးမော့ဆို၊ ဖရူဆို စတဲ့မြို့နယ်နဲ့ ရှမ်းတောင် ဆီဆိုင်၊ ဖယ်ခုံမြို့နယ်မှာ နေထိုင်သူတွေ ပါဝင်တယ်လို့ ဆိုပါတယ်။
စစ်တပ်နဲ့ PNO ဘက်က အရပ်သားအပေါ် ပစ်မှတ်ထား တိုက်ခိုက်တာနဲ့ လူမျိုးစုတစ်စုကို ပစ်မှတ်ထား တိုက်ခိုက်တာတွေ မလုပ်ဖို့ BWIC က တိုက်တွန်းထားပါတယ်။
BWCI ရဲ့ အစီရင်ခံစာနဲ့ ပတ်သက်ပြီး ပအိုဝ်းပြည်သူ့စစ်ဘက်ကတော့ တစ်စုံတစ်ရာ ပြန်လည် တုန့်ပြန်ထားတာ မရှိသေးပါဘူး။
