ပို့လဘား၊ ဒီဇင်ဘာ ၁၂ ရက်၊ စဉ့်ကူး
တော်လှန်ရေးတပ် ထိန်းချုပ်ထားတဲ့ မန္တလေးတိုင်း စဉ့်ကူးမြို့နယ်မှာ စစ်ကောင်စီတပ်က ဗုံးကြဲတိုက်ခိုက်လို့ ဒေသခံတစ်ဦးသေဆုံးပြီး ၅ ဦးဒဏ်ရာရရှိခဲ့တယ်လို့ ဒေသခံအမျိုးသားတစ်ဦးက ပြောပါတယ်။
မနေ့ ဒီဇင်ဘာ ၁၁ ရက် ညနေ ၃ နာရီခွဲမှာ စဉ့်ကူးမြို့နယ် လက်ပံလှကျေးရွာမှာရှိတဲ့ ပင်လယ်ကြီးရပ်ကွက်ဘက်ကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
“လက်ပံလှရဲ့ မြောက်ဘက် ကပ်လျက်မှာရှိတဲ့ ပင်လယ်ကြီးရပ်ကွက်ဘက်မှာ လာကြဲသွားတယ်။ အမျိုးသားတစ်ဦးသေတယ်။ ၅ဦးထိခိုက်ဒဏ်ရာရရှိထားတယ်” လို့ ဆိုပါတယ်။
ဒါ့အပြင် စဉ့်ကူးမြို့နယ် လက်ပံလှကျေးရွာရှိ စိုးအောင်ရပ်ကွက်ဘက်မှာလည်း စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ဒေသခံတွေရဲ့ နေအိမ် ထိခိုက်ပျက်စီးသွားခဲ့တာ ဖြစ်ပါတယ်။
ပြီးခဲ့တဲ့ ဒီဇင်ဘာ ၂ ရက် မနက် ၁၁ နာရီခွဲကျော်မှာလည်း စဉ့်ကူးမြို့နယ် ညောင်ဝန်းကျေးရွာကို စစ်ကောင်စီတပ်က ဗုံးကြဲတိုက်ခိုက်လို့ ဒေသခံတစ်ဦးသေဆုံးပြီး ၄ဦးဒဏ်ရာရရှိခဲ့ပါတယ်။
မန္တလေး PDF နဲ့ ပူးပေါင်းတပ်တွေ ထိန်းချုပ်ထားတဲ့ မန္တလေးတိုင်း စဥ့်ကူးမြို့နယ်ထဲကို စစ်ကောင်စီတပ်ထိုးစစ်ဆင်တိုက်ခိုက်နေပြီး လက်ပန်လှနဲ့ ၅ မိုင်အကွာ စစ်ကောင်စီတပ် ရောက်လာနေတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
