ပို့လဘား၊ ဇန်နဝါရီ ၂ ရက်၊ သိန္နီ
ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် သိန္နီမြို့မှာ စစ်ကောင်စီတပ်က ဗုံးကြဲတိုက်ခိုက်ခဲ့ပါတယ်။
မနေ့ ဇန်နဝါရီ ၁ ရက် ည ၁၁ နာရီခွဲမှာ သိန္နီမြို့ ရပ်ကွက် ၃ ရှိ သိန္နီဟိုတယ်အနီး လေကြောင်းကနေ ဗုံးနှစ်လုံး ကြဲချတိုက်ခိုက်ခဲ့တယ်လို့ MNDAA က ထုတ်ပြန်ထားပါတယ်။
မြို့ခံအမျိုးသားတစ်ဦးက “သိန္နီဟိုတယ်ကို ကြဲတယ်။ ဟိုတယ်ကိုတော့ မထိဘူး။ ဟိုတယ်ဘေးက အိမ်တွေ ထိတယ်။ နှစ်အိမ် သုံးအိမ် ထိထားတယ်” လို့ ပြောပါတယ်။
ဗုံး ကျရောက်ပေါက်ကွဲမှုမှာ သိန္နီဟိုတယ်အနီးမှာရှိတဲ့ နေအိမ်တစ်အိမ်ပေါ် ကျကွဲပြီး နေအိမ်တစ်လုံး ပြိုကျပျက်စီးသွားခဲ့တယ်လို့ ပြောတယ်။
သိန္နီမြို့ကို ပြီးခဲ့တဲ့ ၂ဝ၂၄ ဇန်နဝါရီ လဆန်းပိုင်းမှာ MNDAA နဲ့ ပူးပေါင်းတပ်ဖွဲ့က တိုက်ခိုက်သိမ်းပိုက်နိုင်ခဲ့ပါတယ်။
သိန္နီမြို့ကို သိမ်းပိုက်ပြီးနောက် ၂ဝ၂၄ ဩဂုတ်ကနေ မနေ့ ဇန်နဝါရီ ၁ ရက်အထိ ရွှေဖီမြေက ပြုစုထားတဲ့ စာရင်းအရ လေကြောင်းကနေ ၅ ကြိမ် ဗုံးကြဲတိုက်ခိုက်ခဲ့လို့ အရပ်သား ၁၈ ဦး သေဆုံးပြီး ၇၆ ဦး ထိခိုက်ဒဏ်ရာ ရရှိခဲ့ပါတယ်။
