ရွှေဖီမြေ၊ ဖေဖော်ဝါရီ ၁၅ ရက်
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ တအာင်းတပ်မတော်- PSLF/TNLA တို့အကြား အပစ်ရပ်ရေးအတွက် မနက်ဖြန် ဖေဖော်ဝါရီ ၁၆ ရက်ကစပြီး ဆွေးနွေးပွဲ စတင်မယ်လို့ PSLF/TNLA က ဒီနေ့မှာ ထုတ်ပြန်လာပါတယ်။
PSLF/TNLA ဒုဥက္ကဌ ဒုဗိုလ်ချုပ်ကြီး တားဂျုတ်ဂျားနဲ့ မဟာမိတ် ဆက်ဆံရေးဌာနမှူး ဗိုလ်မှူးကြီး တာမိုးဟိန်းအပါအဝင် ကိုယ်စားလှယ် ၉ ဦးဟာ ဒီနေ့ ဖေဖော်ဝါရီ ၁၅ ရက်မှာ တရုတ်နိုင်ငံ ကူမင်းမြို့သို့ ရောက်ရှိနေပြီလို့ ဆိုပါတယ်။
စစ်ကောင်စီဘက်ကတော့ ပြီးခဲ့တဲ့ ဇန်နဝါရီလထဲ ကိုးကန့်တပ်မတော်- MNDAA နဲ့ ဆွေးနွေးခဲ့တဲ့ ဒုဗိုလ်ချုပ်ကြီး ကိုကိုဦး ဦးဆောင်တဲ့အဖွဲ့ တက်ရောက်မှာ ဖြစ်ပါတယ်။
တရုတ်ရဲ့ ကြားဝင်စေ့စပ်မှုနဲ့ လက်ရှိ စစ်ရေး ပြဿနာတွေကို ဖြေလည်ဖို့ ဆွေးနွေးသွားမယ်လို့ TNLA က ထုတ်ပြန်ထားပြီး ဆွေးနွေးမှု အသေးစိတ်ကိုတော့ ဖော်ပြမထားပါဘူး။
TNLA ဟာ ၁၀၂၇ စစ်ဆင်ရေးအတွင်း မန္တ လေးတိုင်း မိုးကုတ်မြို့အပါအဝင် ရှမ်းမြောက်ရှိ မြို့ ၁၂ မြို့ကို တိုက်ခိုက်သိမ်းပိုက်ထားပြီး ရှမ်းမြောက် နောင်ချိုမြို့နယ် တောင်းခမ်းရွာမှာတော့ စစ်တပ်နဲ့ TNLA တို့အကြား လက်ရှိအချိန်ထိ တိုက်ပွဲ ဆက်လက် ဖြစ်ပွားနေပါတယ်။
ပြီးခဲ့တဲ့ ဇန်နဝါရီ ၁၆ ရက်နဲ့ ၁၇ ရက်မှာ တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ MNDAA တို့ တရုတ်နိုင်ငံမှာ ၂ ရက်ကြာ ဆွေးနွေးခဲ့ပြီး အပစ်ရပ်ဖို့ သဘောတူညီခဲ့ကြောင်း တရုတ်က ကြေညာပေးခဲ့ပါတယ်။
