မြတ်နိုး၊ မေ ၂၄၊ ဝိုင်းမော်
ကချင်ပြည်နယ်၊ ဝိုင်းမော် လုမြန်ရွာ အနီးဘက် စစ်ကြောင်းထိုးလာတဲ့ စစ်ကောင်စီတပ်ဖွဲ့နဲ့ ကချင်တပ်မတော်-KIA ပူးပေါင်း တော်လှန်ရေးတပ်ဖွဲ့တို့ မနေ့ မေလ ၂၃ ရက်နေ့ မနက်အစောပိုင်းက တိုက်ပွဲပြန်လည်ပြင်းထန်ခဲ့ကြောင်း ရှေ့တန်း သတင်းရင်းမြစ်နဲ့ ဒေသခံတွေဆီက သိရပါတယ်။
“စစ်ကောင်စီဘက်က ထိုးစစ်ဆင်လာလို့ ကျွန်တော်တို့ ပြန်လည် ခုခံတိုက်ခိုက်တာ။ အခု ပြန်လှည့်သွားပြီ။ စစ်ကောင်စီဘက်က အကြိမ်ကြိမ် ထိုးစစ်ဆင်ခဲ့တာ ရှိတယ်။ အခုတော့ အားလုံး အဆင်ပြေပါပြီ”လို့ KIA နဲ့ ပူးပေါင်း တော်လှန်ရေး တပ်ဖွဲ့ရဲ့ ရှေ့တန်း သတင်းရင်းမြစ်တစ်ဦးက ပြောပါတယ်။
မြစ်ကြီးနားကနေ ဝိုင်းမော်ဘက်ကို စစ်ကောင်စီတပ်ဘက်က ဒရုန်းတွေ၊ လက်နက်ကြီးတွေနဲ့ ပစ်နေတယ်လို့ သူက ပြောပါတယ်။
လုမြန်ရွာ အနီးက ဒေသခံတွေကလည်း မေလ ၂၃ ရက်နေ့ မနက် ၄ နာရီ ဝန်းကျင်ခန့်ကစ လက်နက်ကြီး အဆက်မပြတ် ပစ်ခတ်သံတွေ ကြားနေရတယ်လို့ ပြောပါတယ်။
ဒါ့အပြင် ဒီရက်ပိုင်းအတွင်း မြစ်ကြီးနားမြို့တွင်း ဖြတ်သွား၊ ဖြတ်လာကို စစ်ကောင်စီတွေက စစ်ဆေးရေး တင်းကြပ်နေတယ်လို့ ဒေသခံတွေက ပြောပါတယ်။
“မေလ ၂၀ ရက်နေ့ည မြစ်ကြီးနား တပ်ကုန်း လမ်းပေါ် လူငယ် ၃ ယောက်ကို စစ်ကောင်စီတွေ တားတာ။ အဲဒီအချိန် အဲဒီ လူငယ်တွေက စစ်ကောင်စီတွေရဲ့ သေနတ် လုယူပြီး စစ်ကောင်စီ တယောက်ကို ပစ်သတ်ခဲ့လိုက်ပြီးတော့ ထွက်ပြေး လွတ်မြောက်သွားကြတာ။ အဲဒါကြောင့် စစ်ကောင်စီတွေ မြို့ထဲ ဖြတ်သွားဖြတ်လာတွေကို စစ်ဆေးနေတာ။” လို့ ဒေသခံ အမျိုးသမီး တစ်ဦးက ပြောပါတယ်။
ဒီရက်ပိုင်း မြစ်ကြီးနားမြို့ပေါ်မှာ စစ်ကောင်စီတွေက ဖြတ်သွား ဖြတ်လာ ပြည်သူတွေကို လမ်းဆုံလမ်းခွတိုင်း စောင့်ကြပ်ကာ Wifi စက်တွေ ယူလာပြီး စစ်ဆေးနေသလို ဖားကန့် – ဝှေခါလမ်းကနေ မြစ်ကြီးနားဘက် အဆင်းလမ်း ဒေသအခေါ် နမ်မောန်နဲ့ နောင်းအိန် ဝန်းကျင်မှာလည်း မေလ ၂၂ ရက်နေ့က ခရီးသွားတချို့ကို ရှမ်းနီ ပြည်သူ့စစ်တွေက ဖုန်းတွေပါ စစ်တယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
