မိုင်းရူပ၊ ဧပြီ ၂၁ ရက်၊ နောင်ချို
စစ်ကောင်စီတပ် ထိုးစစ်ဆင် တိုက်ခိုက်လာတာကြောင့် ရှမ်းမြောက် နောင်ချိုမြို့နယ်ထဲမှာ စစ်တပ်နဲ့ တအာင်းတပ်- TNLA တို့အကြား တိုက်ပွဲ ဆက်ဖြစ်နေတယ်လို့ ရှေ့တန်း သတင်းအရင်းအမြစ်တွေက ရွှေဖီမြေကို ပြောပါတယ်။
စစ်တပ်က ထိုးစစ်ဆင် တိုက်ခိုက်နေတာကြောင့် မနေ့ ဧပြီ ၂၀ ရက်မှာ နောင်ချိုမြို့နယ် မဲပုတ်ရွာထဲ စစ်ကောင်စီတပ်နဲ့ TNLA တို့အကြား တိုက်ပွဲ အပြင်းအထန် ဖြစ်ပွားခဲ့တယ်လို့ ဆိုပါတယ်။
“စစ်ကောင်စီက အမြှောက်တပ် ၃၅၄ ကနေ ထိုးလာတာ။ မနေ့အထိ မဲပုတ်ရွာမှာ တိုက်ပွဲပြင်းထန်နေတယ်။ မဲပုတ်က စစ်ကောင်စီတစ်ခြမ်း၊ TNLA တစ်ခြမ်းပေါ့။ ထိုင်ထားတာ။ ဒီနေ့မနက်အထိတော့ လက်နက်ကြီးနဲ့ အပြန်အလှန် ပစ်ခတ်နေတယ်” လို့ ရှေ့တန်းသတင်းအရင်းအမြစ်တွေက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီလကစပြီး TNLA တပ်စခန်းတွေကို စစ်တပ်က ထိုးစစ်ဆင် တိုက်ခိုက်နေတာဖြစ်ပြီး TNLA ဘက်က နေရာတချို့ ပြန်လည် လက်လွှတ်ခဲ့ရတာ ရှိနေပြီး နှစ်ဖက်အထိအခိုက် အကျအဆုံးလည်း များခဲ့ပါတယ်။
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂ တပ်အပါအဝင် အမြှောက်တပ်တပ်စခန်းတွေ ဖြစ်တဲ့ ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားတာဖြစ်ပြီး ပြီးခဲ့တဲ့ ၂၀၂၄ ခုနှစ် ဩဂုတ်လကတည်းက စစ်တပ်နဲ့ TNLA တို့အကြား တိုက်ပွဲ ဖြစ်ပွားခဲ့တာပါ။
TNLA ပါဝင်တဲ့ ညီနောင်မဟာမိတ် ၃ ဖွဲ့က ဧပြီတစ်လလုံး အပစ်ရပ်ကြောင်း ထုတ်ပြန်ထားသလို စစ်ကောင်စီကလည်း ၃ ပတ်ကြာ အပစ်ရပ်မယ်လို့ ကြေညာထားပေမဲ့ လေကြောင်းနဲ့ တိုက်ခိုက်တာ၊ ထိုးစစ်ဆင်တာတွေတော့ ဆက်တိုက် လုပ်ဆောင်နေပါတယ်။
