မိုင်းရူပ၊ ဧပြီ ၇ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ်က ၇ မိုင်ကျေးရွာမှာ တအာင်းတပ်မတော် TNLA၊ မိုးကုတ်ဗျူဟာ၊ မန္တလေး PDF ပူးပေါင်းအဖွဲ့နဲ့ စစ်ကောင်စီတပ်တို့အကြား တိုက်ပွဲဆက်လက်ပြင်းထန်နေတယ်လို့ ရှေ့တန်းစစ်မြေပြင်မှာ ရှိနေသူတွေက ပြောပါတယ်။
၇ မိုင်ကျေးရွာမှာ ဒီရက်ပိုင်းအတွင်း နေ့စဥ်လိုလို တိုက်ပွဲတွေ ပြင်းထန်နေပြီး မနေ့ ဧပြီ ၆ ရက် တိုက်ပွဲမှာ မိုးကုတ်ဗျူဟာ တပ်ဖွဲ့ဝင်တစ်ဦး ကျဆုံးခဲ့တယ်လို့ ၇ မိုင်တိုက်ပွဲမှာ ပါဝင်တိုက်ခိုက်နေတဲ့ တော်လှန်ရေး ရဲဘော်တစ်ဦးက ရွှေဖီမြေကို ပြောပါတယ်။
” ဒီနေ့ (ဧပြီ ၇ ရက်) မနက် ၅ နာရီ ကတည်းက တိုက်ပွဲဖြစ်နေတာ။ မနေ့က မိုးကုတ်ဗျူဟာ ၁ ယောက်ကျတယ်။ ဒီနေ့က TNLA၊ မိုးကုတ်ဗျူဟာ၊ မန္တလေး PDF ရော လက်လွတ်ရတဲ့ နေရာတွေကို ထိုးစစ်ပြန်လုပ်တာ” လို့ ဆိုပါတယ်။
၇ မိုင်တိုက်ပွဲမှာ စစ်ကောင်စီတပ်ဘက်ကလည်း ထိခိုက်သေဆုံးမှုရှိပြီး အရေအတွက် အတိအကျကိုတော့ မသိရသေးဘဲ စစ်ကောင်စီတပ်ဘက်က လေကြာင်းတိုက်ခိုက်မှုတွေ ဆက်လုပ်နေပါတယ်။
ရှမ်းမြောက် မိုးမိတ်နဲ့ မန္တလေးတိုင်း မိုးကုတ်မြို့ကို တအာင်းတပ်မတော် TNLA သိမ်းပိုက်ပြီးနောက် ထွက်ပြေးသွားတဲ့ စစ်ကောင်စီတပ်ဖွဲ့ဝင်တွေလည်း ၇ မိုင်မှာရှိတဲ့ စစ်ကောင်စီတပ်ဖွဲ့တွေနဲ့ သွားရောက်ပူးပေါင်းနေတာ ဖြစ်ပါတယ်။
သပိတ်ကျင်းမြို့ကို ပြီးခဲ့တဲ့ ၂၀၂၄ ဩဂုတ် ၃၀ ရက်မှာ တော်လှန်ရေး အင်အားစုတွေက တိုက်ခိုက်သိမ်းပိုက်နိုင်ခဲ့တာဖြစ်ပြီး စစ်ကောင်စီရဲ့ ၇ မိုင်တပ်စခန်း၊ ကျောက်ကြီးတပ်စခန်းနဲ့ တန်းမြင့်လေ့ကျင်းရေးကျောင်း အမှတ် (၁၃) တပ်တို့ ကျန်ရှိနေတာ ဖြစ်ပါတယ်။
မြန်မာနိုင်ငံမှာ ငလျင်လှုပ်ခတ်မှု ဖြစ်ပွားပြီးနောက် စစ်ကောင်စီတပ်နဲ့ TNLA တပ်တို့ ယာယီအပစ်ရပ်စဲကြောင်း ထုတ်ပြောကြပေမယ့် နှစ်ဖက်အပြန်အလှန် တိုက်ခိုက်မှုတွေတော့ ဆက်ရှိနေပါတယ်။
