လွေးထွေး၊ ဇန်နဝါရီ ၂၀ ရက်၊ ဆိပ်ဖြူ
မကွေးတိုင်း ဆိပ်ဖြူမြို့နယ်အခြေစိုက် စစ်ကောင်စီတပ်ရဲ့ ဗုံးသီးတွေ ထုတ်လုပ်တဲ့ ကာကွယ်ရေးပစ္စည်းစက်ရုံ ကပစ(၂၁) စက်ရုံကို Brave Warriors for Myanmar- BWM က ရှော့တိုက်ဒုံးနဲ့ ပစ်ခတ်တိုက်ခိုက်ခဲ့လို့ အရာရှိအပါအဝင် ၉ ဦး သေဆုံးပြီး ၈ ဦး ဒဏ်ရာ ရခဲ့ပါတယ်။
ဇန်နဝါရီ ၁၈ ရက် ညနေ ၄ နာရီခွဲဝန်းကျင်မှာ စစ်တပ်ရဲ့ လေတပ်သုံး ဗုံးတွေ ထုတ်လုပ်တဲ့ ကပစ(၂၁)ကို ၁၀၇ မမ ရှော့တိုက်ဒုံး ၈ လုံးနဲ့ BWM က ပစ်ခတ်တိုက်ခိုက်ခဲ့တာလို့ ဆိုပါတယ်။
BWM ရဲ့ တာဝန်ရှိသူတစ်ဦးက “အဲနေရာက နိုင်ငံတစ်ဝှမ်းက လူထုတွေကို ဗုံးကြဲတဲ့နေရာမှာ အသုံးပြုတဲ့ ပေါင် ၂၅၀၊ ပေါင် ၅၀၀ ဗုံးသီးနဲ့ Cluster ဗုံးသီးတွေကို အဓိက ထုတ်လုပ်ပေးတာဖြစ်တယ်” လို့ ပြောပါတယ်။
အဲဒီတိုက်ခိုက်မှုကို BWM အဖွဲ့က ဦးဆောင်ပြီး Eagle Brigade (ANyar Eagle)အဖွဲ့၊ No More Dictatorship- NMD အဖွဲ့၊ Shadow (Mandalay)အဖွဲ့နဲ့ ဒေသခံတော်လှန်ရေး အင်အားစုတွေ ပူးပေါင်းဖော်ဆောင်ခဲ့တာလို့လည်း ဆိုပါတယ်။
အလားတူ ပြီးခဲ့တဲ့ ဇန်နဝါရီ ၁၄ ရက်ကလည်း BWM က အနောက်မြောက်တိုင်း စစ်ဌာနချုပ်ကို ရှော့တိုက်ဒုံးနဲ့ ပစ်ခဲ့လို့ ဗိုလ်ကြီးအပါအဝင် ၆ ဦး သေဆုံးပြီး ၃ ဦး ဒဏ်ရာရခဲ့သလို ဒုစစ်ခေါင်းဆောင် ဗိုလ်ချုပ်ကြီး စိုးဝင်းက ညစာစားပွဲ တက်ရောက်ခဲ့တဲ့ ကရင်နီပြည် ခန်းမထဲကိုလည်း ရှော့တိုက်ဒုံး ၅ လုံးနဲ့ ပစ်ခတ်တိုက်ခိုက်ခဲ့ဖူးပါတယ်။
