ယာရူစိင်၊ ဖေဖော်ဝါရီ ၂၈ ရက်၊ နမ့်လန်
ရှမ်းမြောက် သီပေါမြို့နယ် နမ့်လန်မြို့မှာရှိတဲ့ စစ်ကောင်စီဂိတ်တွေမှာ တအာင်းလူမျိုးတွေကို အဓိက ပစ်မှတ်ထားပြီ ဖမ်းဆီးစစ်ဆေးကာ ငွေ အဆမတန် တောင်းနေကြောင်း ဒေသခံတွေက ရွှေဖီမြေကို ပြောပါတယ်။
ပြီးခဲ့တဲ့ ဖေဖော်ဝါရီ ၂၄ ရက်ကလည်း လင်မယား ၂ ဦးဟာ နမ္မတူမြို့မှာရှိတဲ့ သမီးဖြစ်သူဆီ အလည် လာနေချိန် နမ့်လန်မြို့မှာရှိတဲ့ စစ်ကောင်စီ စစ်ဆေးရေးဂိတ်တစ်ခုမှာ ဖမ်းဆီးခံခဲ့ရတယ်လို့ ဖြစ်စဉ်သိရှိသူ အမျိုးသမီးတစ်ဦးက ပြောပါတယ်။
“သူတို့ရဲ့သမီးက သူများဆီမှာ အလုပ် လုပ်တာလေ။ ၅ နှစ်လောက် ရှိပြီ သူတို့ မတွေ့ဖြစ်တာ ဒါကြောင့် အလည်လာတာပေါ့။ သူတို့နှစ်ယောက်လုံးလည်း တအာင်းလူမျိုးတွေပါ။ ဗမာစကား သိပ်မတတ်တော့လေ။ သူတို့နဲ့ ညှိနှိုင်းတာ အဆင်မပြေဘူး။ ဖမ်းထားလိုက်တယ်။ ပြီးတော့ ပိုက်ဆံတောင်းတော့ ပေးလိုက်ရတယ်”
အဲဒီလင်မယား ၂ ဦးဟာ စစ်တပ်ကို တစ်ဦးလျှင် ငွေ ၃ သိန်း ပေးခဲ့ရပြီး ပြီးခဲ့တဲ့ ဖေဖော်ဝါရီ ၂၆ ရက်မှာ ပြန်လွှတ်လာတာလို့ ဆိုပါတယ်။
နောက်ထပ် သတင်းအရင်းအမြစ် အမျိုးသားတစ်ဦးက “တစ်ကယ်ဆို နမ့်လန်မှာ ဖမ်းခံရတဲ့ တအာင်းလူငယ်တွေ မနည်းတော့ပါဘူးဗျ။ စစ်တပ်က ဖမ်းတယ် ပြီးရင် ငွေ အများကြီး တောင်းတယ်။ ပြီးမှပဲ ပြန်လွှတ်ပေးတယ်။ တခြားလူမျိုးတွေကျ စစ်ဆေးရေး မတင်းကြပ်ဘူး။ ၁၃/ လူထုတွေထဲက တအာင်းလူမျိုးတွေကိုဘဲ အဓိက စစ်ဆေးရေး ပိုတင်းကြပ်တယ်ဗျ” လို့ ပြောပါတယ်။
အလားတူ ပြီးခဲ့တဲ့ ဖေဖော်ဝါရီ ၁၃ ရက်က လောက်ကိုင်မြို့ဘက် အလုပ်လုပ်ဖို့ သွားတဲ့ တအာင်းလူငယ် ၃ ဦးဟာ နမ့်လန်မြို့မှာ ရှိတဲ့ စစ်တပ်ဂိတ်တစ်ခုမှာ ဖမ်းဆီးခံရပြီး တစ်ဦးကို ငွေ ၄ သိန်း ပေးပြီးနောက် ဖေဖော်ဝါရီ ၁၉ ရက်မှာ ပြန်လွှတ်ပေးခဲ့ဖူးပါတယ်။
နမ့်လန်မြို့ကို စစ်တပ်က ထိန်းချုပ်ထားတာဖြစ်ပြီး သီပေါမြို့ကိုတော့ တအာင်းတပ်က ၂ လကျော်ကြာ ထိုးစစ်ဆင် တိုက်ခိုက်ပြီးနောက် ၂၀၂၄ အောက်တိုဘာ ၁၃ ရက်မှာ မြို့ကို ထိန်းချုပ်နိုင်ခဲ့တာ ဖြစ်ပါတယ်။
