ယာရူစိင်၊ ဖေဖော်ဝါရီ ၂၄ ရက်၊ နမ့်လန်
ရှမ်းမြောက် သီပေါမြို့နယ် နမ့်လန်မြို့မှာရှိတဲ့ စစ်ကောင်စီတပ် စစ်ဆေးရေးဂိတ်တစ်ခုမှာ တအာင်းလူငယ် ၃ ဦးကို ဖမ်းဆီးကာ တစ်ဦးကို ငွေ ၄ သိန်း တောင်းပြီး ပြန်လွှတ်ပေးခဲ့ပါတယ်။
ဖြစ်စဉ်ဟာ ပြီးခဲ့တဲ့ ဖေဖော်ဝါရီ ၁၃ ရက်က လောက်ကိုင်မြို့ဘက် အလုပ် သွားလုပ်ဖို့အတွက် နေရပ်ကနေ နမ့်လန်မြို့ဘက် သွားနေချိန်မှာ ဖမ်းဆီးခံခဲ့ရကြောင်း ကိုယ်တိုင်ကြုံတွေ့ခဲ့ရသူ အမျိုးသားတစ်ဦးက ရွှေဖီမြေကို ပြောပါတယ်။
“စစ်တပ်ဂိတ် ရောက်တော့ သူတို့က အရမ်းရစ်တယ် ရှင်းပြခွင့်လည်း မပေးဘူး။ တစ်ခါတည်း ကျနော်တို့ကို ဖမ်းထားပြီး ပြန်လွှတ်ချင်ရင် ပိုက်ဆံပေးရမယ့်ပုံစံမျိုးနဲ့ ကျနော်တို့ကို ပြောတယ်ပေါ့။ တအာင်းလူမျိုး ဖြစ်နေလို့ ဖမ်းတာလား မသိဘူးဗျ။ ပိုက်ဆံ တောင်းတာက တစ်ယောက်ကို ၄ သိန်းဆိုတာ နည်းတာမှ မဟုတ်တာဗျ။ အိမ်က အဆင်မပြေလို့ အလုပ် လုပ်ဖို့ သွားတာလေ သူတို့ လုပ်ရပ်က အတော်လေး ရွံစရာကောင်းတယ်”
စစ်တပ်က တောင်းတဲ့ ငွေပမာဏကို ပေးဆောင်ပြီးနောက် ပြီးခဲ့တဲ့ ဖေဖော်ဝါရီ ၁၉ ရက်မှာ ပြန်လွှတ်ပေးလိုက်တယ်လို့ ဆိုပါတယ်။
နမ့်လန်မြို့မှာရှိတဲ့ စစ်တပ်ဂိတ်ဟာ ခရီးသွားလာသူထဲက တအာင်းလူထုတွေကိုသာ စစ်ဆေးရေး ပိုတင်းကြပ်နေကြောင်း ဒေသခံတွေရဲ့ ပြောပြချက်အရ သိရပါတယ်။
နမ့်လန်မြို့ကို စစ်တပ်က ထိန်းချုပ်ထားတာဖြစ်ပြီး သီပေါမြို့ကိုတော့ တအာင်းတပ်က ၂ လကျော်ကြာ ထိုးစစ်ဆင် တိုက်ခိုက်ပြီးနောက် ၂၀၂၄ အောက်တိုဘာ ၁၃ ရက်မှာ မြို့ကို တအာင်းတပ်က ထိန်းချုပ်နိုင်ခဲ့တာ ဖြစ်ပါတယ်။
