မိုင်းရူပ၊ မတ်လ ၂၈ ရက်၊ နန်းပန်
ရှမ်းတောင် ညောင်ရွှေမြို့နယ် နန်းပန်မြို့မှာ ငလျင်ဘေးကြောင့် သေဆုံးသူ ၂၅ ဦးထက်မနည်း ရှိနိုင်တယ်လို့ ကူညီကယ်ဆယ်ရေး လုပ်ပေးနေသူတစ်ဦးက ရွှေဖီမြေကို ပြောပါတယ်။
ငလျင်ဒဏ်ကြောင့် သေဆုံးသူရဲ့ အလောင်းတွေကို ဆက်လက် ရှာဖွေနေပြီး ဒီနေ့ မတ်လ ၂၈ ရက် ညနေ ၄ နာရီခွဲအထိ ရရှိထားတဲ့ စာရင်းအရ သေဆုံးသူ ၂၅ ဦး ရှိတယ်လို့ ဆိုပါတယ်။
“လူက အခုလောလောဆယ် ၂၅ ယောက်လောက် သေတယ်။ အိမ်တွေတော့ တော်တော်များများ ပြိုကုန်တယ်။ ဆေးရုံကိုလည်း ထပ်ရောက်လာသေးတယ်” လို့ ကူညီကယ်ဆယ်ရေး လုပ်ပေးနေသူ အမျိုးသားတစ်ဦးက ရွှေဖီမြေကို ပြောပါတယ်။
ငလျင်ဒဏ်ကြောင့် နေအိမ် အများစုလည်း ပျက်စီးခဲ့ပြီး သေဆုံးသူတွေရဲ့ အရေအတွက်လည်း ထပ်တိုးလာနိုင်တယ်လို့ သူက ဆက်ပြောပါတယ်။
ဒီနေ့ နေ့လယ် ၁ နာရီဝန်းကျင်ကစပြီး နိုင်ငံတဝန်းမှာ ငလျင်လှုတ်ခတ်မှု ဖြစ်ပွားခဲ့ပြီး အဆောက်အဦး ပြိုကျပျက်စီးမှုအပြင် သေဆုံးသူလည်း များနေပြီး အရေအတွက်ကိုတော့ အတည်မပြုနိုင်သေးပေ။
ငလျင်ကြောင့် ထိခိုက်မှုများတဲ့ မန္တလေး၊ စစ်ကိုင်း၊ မကွေး၊ ပဲခူးတိုင်းနဲ့ ရှမ်းပြည်နယ် အရှေ့မြောက်ဒေသအပြင် နေပြည်တော်ကောင်စီနယ်မြေတွေကို စစ်ကောင်စီရဲ့ အမျိုးသား သဘာဝ ဘေးအန္တရာယ်ဆိုင်ရာ စီမံခန့်ခွဲမှုကော်မတီက အရေးပေါ်အခြေအနေ ကြေညာထားပါတယ်။
