ရွှေဖီမြေ၊ ဩဂုတ် ၂၅ ရက်၊ ထားဝယ်
တနင်္သာရီတိုင်း ထားဝယ်မြို့နယ် သင်္ကန်းတုန်းကျေးရွာမှာ စစ်ကောင်စီတပ်နဲ့ တော်လှန်ရေး ပူးပေါင်းတပ်ဖွဲ့တို့ တတိယအကြိမ် ထိတွေ့တိုက်ပွဲ ဖြစ်ပွားခဲ့တယ်လို့ ဒူရကစစ်ကြောင်းက မနေ့ ဩဂုတ် ၂၄ ရက်မှာ ထုတ်ပြန်ထားပါတယ်။
ဩဂုတ် ၂၁ ရက် မနက် ၅ နာရီမှာ ထိတွေ့တိုက်ပွဲ စတင်ဖြစ်ပွားခဲ့ပြီး တိုက်ပွဲအတွင်း စစ်တပ်ဘက်မှ ၂၀ ဦးထက်မနည်း သေဆုံးခဲ့ပြီး ဒဏ်ရာ ရသူလည်း ရှိခဲ့တယ်လို့ ဖော်ပြထားပါတယ်။
တိုက်ပွဲအတွင်း စစ်တပ်ဆီကနေ MA-1 ၂ လက်၊ ကျည်ဘောက် ၁၂ ခု၊ အီနာဂါ ၅ လုံး၊ လက်ပစ်ဗုံး ၅ လုံးနဲ့ စစ်အသုံးဆောင်ပစ္စည်းတချို့ကိုလည်း သိမ်းဆည်းရမိခဲ့တဲ့အပြင် တော်လှန်ရေးတပ်ဖွဲ့ဘက်ကလည်း တစ်ဦး ကျဆုံးပြီး ၃ ဦး ဒဏ်ရာ ရရှိခဲ့တယ်လို့ ဆိုပါတယ်။
တိုက်ပွဲကို ထားဝယ်အမျိုးသား လွတ်မြောက်ရေးတပ်တော်- DNLA ရဲ့ ဒူရကစစ်ကြောင်း၊ ထားဝယ် ပြည်သူ့လွတ်မြောက်ရေးတပ်ဖွဲ့- TPLF၊ ဧဒင်မှူး၊ ကျားသစ်နက်၊ ဘီးလုံးပြောက်ကျားတပ်ဖွဲ့၊ ဒေါနတပ်ခွဲ ၇၊ ထားဝယ် အရှေ့တောတပ်ဖွဲ့တို့က ပူးပေါင်းတိုက်ခိုက်ခဲ့တယ်လို့ ထုတ်ပြန်ချက်ထဲ ဖော်ပြထားပါတယ်။
တစ်နိုင်ငံလုံးအတိုင်းအတာနဲ့ စစ်ရေး အရှိန်အဟုန် တိုးမြင့်စွာ ပြုလုပ်နေချိန်ဖြစ်ပြီး စစ်တပ်ရဲ့ လေကြောင်း တိုက်ခိုက်မှုဟာလည်း အချိန်မရွေး ပြုလုပ်နေတာကြောင့် လူထုတွေအနေနဲ့ စစ်ရေးသတိရှိစွာ နေထိုင်ကြဖို့ အသိပေးထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
