ရဲမာန်၊ ဩဂုတ် ၂၆ ရက်
တနင်္သာရီတိုင်း ဘုတ်ပြင်းမြို့ကနေ လေညာမြို့ဘက်သို့ ဦးတည်တက်လာတဲ့ စစ်တပ်ယာဥ်တန်း ၃ စီးကို တော်လှန်ရေးတပ်တို့က ကြားဖြတ်တိုက်ခိုက်ခဲ့တယ်လို့ ကရင်အမျိုးသားအစည်းအရုံး KNU က မနေ့ ဩဂုတ်လ ၂၅ ရက်မှာ ထုတ်ပြန်ထားပါတယ်။
မနေ့ ဩဂုတ်လ ၂၅ ရက် နေ့လယ် ၁၂ နာရီကျော်မှာ လေညာမြို့ဘက်ကို ဦးတည်တက်လာတဲ့ စစ်တပ်ယာဥ်တန်းကို ကရင်အမျိုးသား လွတ်မြောက်ရေးတပ်မတော် KNLA မှ တောင်ယွန်းကျေးရွာအနီးမှာ စောင့်ကြိုတိုက်ခိုက်ခဲ့ရာ ၂၀ ဦးထက်မနည်း သေဆုံးခဲ့တယ်လို့ ဖော်ပြထားပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီးက “နယ်စပ်တစ်ကြောမှာ ကျနော်တို့ တပ်မဟာ ၄ ပြန်ပြီးသိမ်းယူတာ ကုန်သလောက်ရှိပြီ။ နတ်အိမ်တောင် တဝိုက်လေးဘဲ ကျန်တာ။ နယ်စပ်ကုန်သွယ်ရေးဇုန်ရှိတဲ့ နေရာတွေက ကျနော်တို့ လက်ထဲပြန်ရောက်လာတဲ့အခါ အဲဒါကို ရဖို့အတွက် ပြန်လုံးပမ်းပြီး တစ်ဖက်ကနေ ပြန်ပြီး ထိုးစစ်ဆင်နေတာဟာ ခဏခဏပါဘဲ” လို့ ပြောပါတယ်။
အဲဒီတိုက်ခိုက်မှုကြောင့် စစ်တပ်ဘက်က အထိနာသွားပြီး ဘုတ်ပြင်းမြို့ဘက်သို့ ပြန်လည်ဆုတ်ခွာသွားခဲ့ရပြီး တိုက်ခိုက်မှုအတွင်း တော်လှန်ရေးဘက်က ထိခိုက်မှုမရှိဘဲ ပြန်လည်ဆုတ်ခွာနိုင်ခဲ့တယ်လို့လည်း ထုတ်ပြန်ထားပါတယ်။
ပြီးခဲ့တဲ့ ဩဂုတ်လ ၁၈ ရက်နဲ့ ၁၉ ရက်တွေမှာ ထားဝယ်မြို့ကနေ မေတ္တာမြို့ဘက်ကို စစ်ကြောင်းထိုးလာခဲ့တဲ့ စစ်တပ်စစ်ကြောင်းကို တော်လှန်ရေး ပူးပေါင်းတပ်မှ တိုက်ခိုက်ခဲ့ရာ ၂၀ ဦး သေဆုံးပြီး ထောက်ပို့ကား ၈ စီးကိုလည်း မီးရှို့ဖျက်ဆီးနိုင်ခဲ့တယ်လို့ သိရပါတယ်။
ဓရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
