မိုင်းရူပ၊ ဧပြီ ၁၈ ရက်၊ စဥ့်ကူး
တော်လှန်ရေး အင်အားစုတွေ ထိန်းချုပ်ထားတဲ့ မန္တလေးတိုင်း စဉ့်ကူးနဲ့ သပိတ်ကျင်းမြို့နယ်မှာ လေယာဥ်နဲ့ ဗုံးဆက်တိုက်ကြဲနေပြီး သပိတ်ကျင်းမြို့နယ် လိပ်ကျရွာ ဗုံးကြဲတိုက်ခိုက်ခဲ့ရမှုမှာ ကလေးငယ်အပါအဝင် အရပ်သား ၁၃ ဦးထက်မနည်း သေဆုံးခဲ့တယ်လို့ မြေပြင်မှာ ရှိနေသူတွေက ရွှေဖီမြေကို ပြောပါတယ်။
ဒီနေ့ ဧပြီ ၁၈ ရက် မနက်ပိုင်းမှာ လိပ်ကျရွာကို ဂျက်လေယာဥ်နဲ့ ဗုံးကြဲတိုက်ခိုက်ခဲ့တာဖြစ်ပြီး ကလေးအပါအဝင် အရပ်သား ၁၂ ဦးထက်မနည်း သေဆုံးခဲ့တယ်လို့ ဆိုပါတယ်။
“လိပ်ကျ ကြဲသွားတာက တော်တော်လေး ထိတယ်။ ၁၃ ယောက် သေတယ်။ ကျည်တောက်ပေါက် ကြဲသွားသေးတယ်” လို့ မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
ဒီနေ့ညနေပိုင်းမှာ သပိတ်ကျင်းမြို့နယ်ထဲက ရွာတစ်ရွာကို ဗုံး ထပ်မံ ကြဲချတိုက်ခိုက်ခဲ့ရာ ဒဏ်ရာရသူ ၃ ဦး ရှိတယ်လို့ သူက ဆက်ပြောပါတယ်။
ဒါ့အပြင် ဒီနေ့ နေ့လယ် ၃ နာရီဝန်းကျင်က စဥ့်ကူးမြို့နယ် ကျည်တောက်ပေါက်ရွာ စာသင်ကျောင်းကို ဗုံးကြဲချခဲ့ရာ ဒဏ်ရာရသူ ၆ ဦးနဲ့ နေအိမ်တွေ ပျက်စီးခဲ့တယ်လို့ သိရပါတယ်။
အပစ်ရပ်ထားတဲ့ စစ်ကောင်စီဟာ နေ့စဥ်လိုလို လေကြောင်း တိုက်ခိုက်မှု ဆက်လက် လုပ်ဆောင်နေပြီး အရပ်သား သေဆုံးမှုလည်း ဆက်လက် တိုးလာနေပါတယ်။
မနေ့ ဧပြီ ၁၇ ရက် နှစ်သစ်ကူးနေ့မှာလည်း တအာင်းတပ်မတော်- TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ အရှေ့ပိုင်းကို ဗုံးကြဲတိုက်ခိုက်ခဲ့ပါတယ်။
စစ်တပ်ဘက်ကတော့ အရပ်သားတွေကို ပစ်မှတ်ထားပြီး လေကြောင်း အသုံးပြုကာ တိုက်ခိုက်ခဲ့တာနဲ့ ပတ်သက်ပြီးတော့ တစ်စုံတစ်ရာ တုန့်ပြန်ထားတာ မရှိသေးပါဘူး။
