မိုင်းပန်ပျော်၊ ဇန်နဝါရီ ၁၉ ရက်၊ ၁၀၅ မိုင်
ညီနောင်မဟာမိတ် ၃ ဖွဲ့ ထိန်းချုပ်ထားတဲ့ ရှမ်းမြောက် တရုတ်-မြန်မာနယ်စပ် မူဆယ် ၁၀၅ မိုင်မှာ သတ်မှတ်ထားတဲ့ အခွန်ထက် ပိုကောက်နေကြောင်း ကားသမားတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ ဇန်နဝါရီ ၁၀ ရက်မှာ နမ့်ဖတ်ကာကနေ မူဆယ်မြို့ဘက် ပဲပုပ် ၁ဝ အိတ် တင်သွားတဲ့ ကားတစ်စီးကို ငွေ ၁ သိန်းခွဲ တောင်းခဲ့တယ်လို့ ကိုယ်တိုင်ကြုံတွေ့ခဲ့ရတဲ့ ကုန်တင်ကားသမားတစ်ဦးက ပြောပါတယ်။
“ကုန်တွေဆိုရင် တစ်တန်ကို တရုတ်ယွမ်ငွေ ၁ဝဝ ကောက်တာ။ အဲနေ့က ဘီးလိမ့်ခွန်ဆောင်ရင်း ကုန်စည်ခွန်လည်း သွားဆောင်လိုက်တယ်။ သွားဆောင်တဲ့အချိန်မှာ ပဲပုတ် ၁ အိတ်ကို ဘယ်လောက် ဆောင်ရမလဲ မေးတော့ တစ်အိတ်ကို (၁,၂၀၀)တဲ့။ ပြီးတော့ သူတို့ရဲ့လူကြီးဆီ ဖုန်းပြန်ဆက်လိုက်တယ် ပဲပုတ် ဆယ်အိတ်က ဘယ်လောက် ဆောင်ရမလဲ တစ်သိန်းခွဲ ဆောင်ရမယ်တဲ့။ လူကြီးက ဆောင်ခိုင်းလို့တဲ့ မပေးနိုင်လို့ ညှိရင်း ၄ သောင်းခွဲဘဲ ပေးလိုက်တယ်”
၁၀၅ မိုင်မှာ ညီနောင်မဟာမိတ် ၃ ဖွဲ့က သတ်မှတ်ထားတာထက် ပိုကောက်တာကြောင့် ကုန်သည်နဲ့ ကုန်တင်ကားသမားတွေ အခက်အခဲ ကြုံနေရတယ်လို့ အထက်ပါအမျိုးသားက ဆက်ပြောပါတယ်။
ကားသမား ပြောဆိုချက်နဲ့ ပတ်သက်ပြီး ၁ဝ၅ မိုင်မှာရှိတဲ့ ညီနောင်မဟာမိတ် ၃ ဖွဲ့ဘက်က တာဝန်ရှိသူတွေကို ရွှေဖီမြေက ဆက်သွယ်ဖို့ ကြိုးစားခဲ့ပေမဲ့ ဆက်သွယ်လို့ မရခဲ့ပေ။
ဒါ့အပြင် အခွန်ဌာနမှာ လုပ်ဆောင်နေသူက မြန်မာစကား မကျွမ်းကျင်မှုကြောင့် စစ်ဆေးတာ အချိန်ကြန့်ကြာစေပြီး ဆုံးဖြတ်ချက် ချတာလည်း မပြတ်သားတာကြောင့် ကားသမားတွေကို ခရီးကြန့်ကြာစေတယ်လို့ ဆိုပါတယ်။
ပြီးခဲ့တဲ့ ၂၀၂၄ မေလအတွင်းမှာလည်း ညီနောင်မဟာမိတ် ၃ ဖွဲ့ ထိန်းချုပ်ထားတဲ့ ၁၀၅ မိုင် ကုန်သွယ်ရေးဇုန် စစ်ဆေးရေးဂိတ်မှာ ကောက်ခံနေတဲ့ အခွန်တွေကို လျှော့ပေ့ါ ကောက်ခံပေးဖို့ ကားသမားတွေ တောင်းဆိုခဲ့ဖူးပါတယ်။
