ပျားကြီး၊ ဖေဖော်ဝါရီ ၇ ရက်၊ ရန်ကုန်
ရန်ကုန်တိုင်း ရွှေပြည်သာမြို့နယ် သပိတ်ကော်မတီက ကိုရန်နောင်ကြည်ဝင်းနဲ့ ကိုသက်ထူးဇော်ကို စစ်ကောင်စီခုံရုံးက အလုပ်ကြမ်းနဲ့ထောင်ဒဏ် ၃ နှစ် ချမှတ်ခဲ့တယ်လို့ ရွှေပြည်သာ သပိတ်ကော်မတီရဲ့တာဝန်ရှိသူတစ်ဦးက ရွှေဖီမြေကို ပြောပါတယ်။
၂၀၂၄ ခုနှစ် ဒီဇင်ဘာ ၁၀ ရက် အပြည်ပြည်ဆိုင်ရာ လူ့အခွင့်အရေးနေ့ (10D)မှာ ရန်ကုန်မြို့တွင်း ဆန္ဒပြပွဲ ပြုလုပ်ပြီး ညပိုင်းမှာ စစ်ကောင်စီရဲ့ ဖမ်းဆီးမှုကို ခံခဲ့ရတဲ့ ကိုရန်နောင်ကြည်ဝင်းနဲ့ ကိုသက်ထူးဇော်ကို မနေ့ ဖေဖော်ဝါရီ ၆ ရက်မှာ အင်းစိန်ထောင်တွင်းစစ်ခုံရုံးက ထောင်ဒဏ်အမိန့် ချမှတ်ခဲ့တာဖြစ်ပါတယ်။
“၅၀၅(က)နဲ့ ချတာ။ အလုပ်ကြမ်း ပါတယ်။ ၃ နှစ်ပေါ့။ ဆုံးရှုံးနေတဲ့ လူ့အခွင့်အရေးကိုတောင်းဆိုလို့ ထောင်ချခံရတာ ဖြစ်တယ်။ ဒီလို ထောင်ချလိုက်လို့လည်း ကျနော်တို့ကတော့ စစ်အာဏာရှင် ကျဆုံးရေးအတွက်ဆက်လက် တိုက်ပွဲဝင်သွားအုံးမှာ ဖြစ်ပါတယ်” လို့ ရွှေပြည်သာ သပိတ်ကော်မတီ- SPTSC ရဲ့တာဝန်ရှိသူက ပြောပါတယ်။
ကိုရန်နောင်ကြည်ဝင်းနဲ့ ကိုသက်ထူးဇော်တို့ဟာ အပြည်ပြည်ဆိုင်ရာ လူ့အခွင့်အရေးနေ့ဖြစ်တဲ့ ဒီဇင်ဘာ ၁၀ ရက်မှာ ၂၀၀၈ ဖွဲ့စည်းပုံ အခြေခံဥပဒေစာအုပ်နဲ့ ရန်ကုန်တိုင်းစစ်ဌာနချုပ်အလံကို မီးရှို့ဖျက်ဆီးပြီး လူ့အခွင့်အရေး ထွန်းကားစေ၊ တရားမျှတ လွတ်လပ်မြေ စာသားတွေ ကိုင်ဆောင်ပြီး ဆန္ဒပြခဲ့ကြတာကြောင့် အခုလို ဖမ်းဆီးထောင်ချခံခဲ့ရတာ ဖြစ်ပါတယ်။
