ခိုင်လေး၊ ဇန်နဝါရီ ၁၅ ရက်၊ ချောက်
မကွေးတိုင်း ချောက်မြို့နယ် လင်းတကိုင်းတိုက်နယ်ထဲ စစ်တပ်က ဝင်ရောက် စီးနင်းပြီး သိန်း ၇၀၀ ခန့် တန်ဖိုးရှိတဲ့ ဒေသခံတွေရဲ့ ငွေကြေးနဲ့ပစ္စည်း လုယက်သွားပြီးတော့ နေအိမ် ၃ အိမ်ကိုလည်း မီးရှို့ဖျက်ဆီးခဲ့ပါတယ်။
မနေ့ ဇန်နဝါရီ ၁၄ ရက် မနက်အစောပိုင်းကစပြီး ချောက်မြို့ အရှေ့တောင်ဘက်မှာရှိတဲ့ လင်းတကိုင်းတိုက်နယ်က ကျေးရွာထဲ ခန့်မှန်းအင်အား ၆၀ နဲ့ ဝင်ရောက်ခဲ့တာလို့ Chauk Guerrilla Force- CGF ရဲ့ တာဝန်ခံ ကိုပိုင်က ရွှေဖီမြေကို ပြောပါတယ်။
ငွေကြေးနဲ့ပစ္စည်း လုယက်တာ၊ နေအိမ် မီးရှို့မှုအပြင် လင်းတကိုင်းတိုက်နယ်ဆေးရုံက ဆေးဝါးကိုလည်း ကား ၆ စီးနဲ့ သယ်ဆောင်သွားတယ်လို့ သူက ဆက်ပြောပါတယ်။
“ကျနော်တို့ ဒီဒေသတွေမှာ တိုက်ပွဲ ဖြစ်တဲ့အခါ ဆေးဝါးကုသမှု အလွယ်မရနိုင်အောင် တမင်လုပ်တာ ဖြစ်တယ်။ လက်ရှိမှာတော့ အကုန်လုံး အဆင်ပြေသွားပါပြီ။ မီးရှို့ခံရတဲ့ နေအိမ်တွေကိုလည်း ကျနော်တို့တပ်က မီးငြိမ်းသတ်နိုင်ခဲ့ပါပြီ။ စစ်ရေးအခြေအနေကတော့ တင်းမာနေဆဲပါဗျ”
CGF နဲ့ ပူးပေါင်းအဖွဲ့က စစ်ကြောင်း ထိုးလာတဲ့ စစ်တပ်ကို ၆၀ မမ လက်နက်ကြီး ၈ လုံး ပစ်ခတ်တိုက်ခိုက်ရာ ရန်သူဘက်မှ ထိခိုက်သေဆုံးမှု ရှိပြီးတော့ အဝေးကနေ ပစ်ခတ်တဲ့ လက်နက်အမျိုးအစား ဖြစ်တဲ့အတွက် အချက်အလက် အတိအကျ မသိရသေးဘူးလို့ သူကဆက်ပြောပါတယ်။
ချောက်မြို့ အရှေ့တောင်ဘက်မှာရှိတဲ့ လင်းတကိုင်းတိုက်နယ်မှာ အိမ်ခြေ ၃၀၀ ကျော်ရှိပြီး စစ်တပ်နဲ့ ပျူစောထီး ပူးပေါင်းတပ်က စစ်ကြောင်းထိုး ဝင်ရောက်ခဲ့တာ ဖြစ်ပါတယ်။
ပြီးခဲ့တဲ့ ၂၀၂၄ ခုနှစ် နိုဝင်ဘာ ၁၃ ရက်က ချောက် ပကဖနဲ့ PDF ရဲ့ ကင်းပွိုင့်စခန်းရှိတဲ့ ဆည်ခံရွာကို စစ်တပ်ဘက်က ဝင်ရောက်စီးနင်းရာ တော်လှန်ရေးတပ်ဖွဲ့ဝင်တွေရဲ့ ခုခံမှုကြောင့် စစ်ကောင်စီတပ် အထိနာခဲ့ဖူးတယ်လို့လည်း ၎င်းက ဆက်ပြောပါတယ်။
