အိုက်ပွီး၊ သြဂုတ် ၂၇ ရက်၊ မြောက်ဦး
ရခိုင်ပြည်နယ် မြောက်ဦးမြို့နယ် ဒိုင်းကျီကျေးရွာ လေကြောင်းတိုက်ခိုက်မှုတွင်း ဒဏ်ရာရရှိသူတွေထဲက အမျိုးသမီးနဲ့ ကလေး နှစ်ဦး ထပ်မံသေဆုံးခဲ့တယ်လို့ ဒေသခံတွေဆီက သိရပါတယ်။
သေဆုံးသွားသူတွေဟာ အသက် ၅ နှစ်အရွယ် မောင်အောင်အောင်နဲ့ အသက် ၃၀ ကျော်အရွယ် ဒေါ်အေးစန္ဒာတို့ဖြစ်ပြီး မနေ့ သြဂုတ်လ ၂၆ ရက် နေ့လယ်ပိုင်းနဲ့ ညနေပိုင်းမှာ သေဆုံးသွားတာ ဖြစ်ပါတယ်။
“ဒဏ်ရာရတဲ့ အယောက် ၂၀ ထဲက ကလေးတစ်ယောက် မနေ့ နေ့လယ်မှာ သေဆုံးတယ်။ ညနေပိုင်းမှာ အမျိုးသမီးတစ်ယောက် ထပ်သေဆုံးတာပါ။ ဗုံးကြဲတုန်း ပြင်းထန်ဒဏ်ရာရနဲ့ သေဆုံးသွားတာပါ” လို့ မြောက်ဦးမြို့ခံတစ်ဦးက ရွှေဖီမြေသို့ ပြောပါတယ်။
မြောက်ဦးမြို့နယ် ဒိုင်းကျီကျေးရွာကို ဩဂုတ်လ ၂၅ ရက် ည ၁၁ နာရီအချိန်မှာ စစ်ကောင်စီရဲ့ လေကြောင်းတိုက်ခိုက်မှုတွင်း သေဆုံးသူ ကလေးအပါအဝင် ၂၄ ဦးထိ ရှိလာတာလည်း ဖြစ်ပါတယ်။
မနေ့ သြဂုတ်လ ၂၆ ရက် ညနေ ၃ နာရီအချိန်ကလည်း မင်းပြားမြို့နယ် ကျောက်ခုတ်ကျေးရွာကို စစ်ကောင်စီတပ်မှ လေကြောင်းနဲ့ ဗုံးသီး သုံးလုံး ကြဲချသွားတယ်လို့ သိရပါတယ်။
“မင်းပြားနဲ့ မြေပုံမြို့နယ်အစပ်က ရွာကို လေယာဥ်နှစ်စီးလောက်နဲ့ ဗုံးသီး သုံးလုံးလောက် ဗုံးကြဲသွားတာပါ။ လူထိခိုက်မှုတော့ မရှိဘူး။ လူတွေက စိုးရိမ်ထိတ်လန့်နေကြတယ်” လို့ မင်းပြားမြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
အဲဒီလေကြောင်းတိုက်ခိုက်မူကြောင့် အရပ်သားထိခိုက်မှု မရှိပေမယ့် ပြည်သူတွေ စိုးရိမ်နေကြရတာ ဖြစ်ပါတယ်။
အလားတူ မနေ့ညနေ ၅ နာရီခန့်မှာလည်း ပေါက်တောမြို့နယ်မှာရှိတဲ့ ပေါက်တော – တောင်ညို ကားလမ်းကြား သပိတ်တောင်ကိုလည်း စစ်ကောင်စီတပ်က လေကြောင်း ဗုံးကြဲတိုက်ခိုက်ခဲ့ပါတယ်။
အဲဒီသပိတ်တောင်မှာ အလုပ်လုပ်ကိုင်နေတဲ့ အရပ်သားတွေရှိပေမယ့် ဆက်သွယ်ရေး ဖုန်းလိုင်းခက်ခဲမှုကြောင့် ထိခိုက်မှု အခြေအနေ မသိရသေးဘူးလို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
