လွေးထွေး၊ မေလ ၁၈ ရက်၊ မန္တလေး
မန္တလေးတိုင်း ကျောက်ဆည်မြို့အနောက်ဘက် ဗဟိုပြုလှုပ်ခတ်ခဲ့တဲ့ ပြင်းအား ၅.၂ အဆင့်ရှိတဲ့ ငလျင် ထပ်မံ လှုပ်ခတ်မှုကြောင့် မန္တလေးတိုင်းရှိ အဆောက်အဦးတချို့ ထပ်ပြိုခဲ့သလို ကလေးအပါအဝင် ၂ ဦး သေဆုံးခဲ့ကြောင်း ဒေသခံတစ်ဦးရဲ့ ပြောပြချက်အရ သိရပါတယ်။
မနေ့ မေလ ၁၇ ရက် ည ၁၀ နာရီခွဲဝန်းကျင်မှာ လှုပ်ခတ်ခဲ့တဲ့ ငလျင်ကြောင့် မတ်လ ၂၈ ရက် နေ့လယ် ၁ နာရီက လှုပ်ခတ်ခဲ့ချိန် အက်ကွဲခဲ့တဲ့ မန္တလေးတိုင်း ချမ်းမြသာစည်၊ ပြည်ကြီးတံခွန်၊ စက်မှု စတဲ့နေရာက အဆောက်အဦး ၁၀ အိမ်ထက်မနည်း ထပ်မံ ပြိုကျခဲ့တာ ဖြစ်ပါတယ်။
စက်မှု ၁ နေ အမျိုးသမီးက “မနေ့ည စက္ကန့် ၃၀ လောက် ထပ်လှုပ်တာ။ အဲချိန်မှာ ဟိုတခါက ယိုင်နေတဲ့အိမ်၊ ကွဲကြောင်း ဖြစ်နေတဲ့အိမ် ၅ လုံးလောက် ပြိုကျတာ။ လူတွေ မနေတော့လို့ လူထိခိုက်သေတာတော့ မရှိဘူး” လို့ ပြောပါတယ်။
ငလျင်လှုပ်ချိန် မဟာအောင်မြေမြို့နယ် ရွှေကူဘုန်းကြီးကျောင်းတိုက်မှာ ဖွင့်ထားတဲ့ ငလျင်ကယ်ဆယ်ရေးစခန်းပေါ် သစ်ပင် လဲကျလို့ ငလျင်ဘေး သင့်ခဲ့သူ ကလေးတစ်ဦးနဲ့ အမျိုးသားတစ်ဦးအပေါ် ကျခဲ့လို့ သေဆုံးသွားကြောင်း ကူညီပေးခဲ့တဲ့ လူမှုကူညီရေးအသင်းရဲ့ ဖော်ပြချက်အရ သိရပါတယ်။
မဟာအောင်မြေမြို့နယ်နေ အမျိုးသားက “ဟိုတခါ လှုပ်ပြီးတဲ့နောက် ငလျင်က ထပ်လှုပ်ပေမဲ့ မနေ့ညလောက် မပြင်းဘူး။ ဟိုဘက်တစ်လမ်းကျော်က ယိုင်နေတဲ့ ၃ ထပ်အိမ်တွေ၊ ၂ ထပ်အိမ်တွေ ပြိုကျတာ ရှိတယ်” လို့ ပြောပါတယ်။
မန္တလေးမြို့အပြင် ကျောက်ဆည်၊ မြစ်သား၊ မြင်းခြံ၊ စစ်ကိုင်း၊ မုံရွာ၊ ပြင်ဦးလွင်နဲ့ ရှမ်းမြောက် နမ့်ခမ်း၊ မူဆယ်နဲ့ နမ့်ဆန် စတဲ့နေရာဒေသတွေမှာပါ ငလျင် လှုပ်ခတ်ခဲ့ကြောင်း ဒေသခံတွေက ပြောဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
