မြတ်နိုး၊ ဇန်နဝါရီ ၂၉ ရက်၊ ပန်ဆိုင်း
မူဆယ်မြို့နယ် ကြူကုတ်ပန်ဆိုင်းမြို့က ၂ နှစ်ကျော်အရွယ် ကလေးငယ်တစ်ဦးကို အဓမ္မ ပြုကျင့်ခဲ့တဲ့ ကိုးကန့်တပ်- MNDAA တပ်ဖွဲ့ဝင်တစ်ဦးကို ထောင်ဒဏ် တစ်သက်တစ်ကျွန်းနဲ့ ငွေဒဏ် တရုတ်ငွေ ယွမ် ၃ သောင်း ချမှတ်ခဲ့ကြောင်း ဒေသခံတွေဆီက သိရပါတယ်။
တရားရေးရာနဲ့ ကလေး မိသားစုဝင် မပါဘဲ ကျူးလွန်တဲ့သူကို ကိုးကန့်တပ်က အမိန့်ချမှတ်လိုက်တာလို့ ဆိုပါတယ်။
“အဲဒီ တရားစီရင်ချက် မချခင် အိမ်ကို တရုတ်ယွမ် ၆,၅၀၀ တော့ လာပေးဖူးတယ်။ အဲဒီ လာပေးတဲ့ တရုတ် ယွမ် ၆,၅၀၀ က ဒီအမှုနဲ့ ပတ်သက်လားလို့ ကျနော်တို့ မေးတော့ မပတ်သက်ဘူး။ ဒီငွေက ကလေးနဲ့ သားအမိတွေ အရမ်းခက်ခဲလို့ ကျနော်တို့ စေတနာနဲ့ လာပေးတာလို့ပြောတယ်။ အရင်တလောက သူတို့ တရားစီရင်ချက် ချပြီးပြီ။ အကြောင်းစုံ ပြောပြမယ်ဆိုလို့ လိုက်သွားတော့ စစချင်း တရုတ်ယွမ် ၆,၅၀၀ နဲ့ ဗမာငွေ တစ်သိန်းကျော် ပေးပြီးပြီတဲ့။ အဲဒါကြောင့် ယွမ် သုံးသောင်းထဲက နှုတ်တယ်ဆိုပြီး ယွမ် ၂၄,၀၀၀ ပဲ ဖြစ်နေတယ်။ အဲဒါကြောင့်မို့ သူတို့ တရားစီရင်ချက်တွေ ရေးထားတဲ့အထဲမှာလည်း မမှန်မကန်တွေပဲ ရေးထားတယ်” လို့ ကလေးငယ်အရေး ကူညီပေးနေသူတစ်ဦးက ရွှေဖီမြေကို ပြောပါတယ်။
MNDAA ဘက်က ကလေးမိခင်မပါဘဲ တရားစီရင်ချက် ချတာကြောင့် ကလေးမိခင်က သဘောမတူဘဲ ကန့်ကွက်ထားသလို ကလေးမိခင် ပါဝင်ပြီး တရားစီရင်ချက်ချဖို့ MNDAA ကို စာပို့ တောင်းဆိုထားတယ်လို့ သူက ဆက်ပြောပါတယ်။
“ကလေးမိခင်က သဘောမတူဘူး။ MNDAA ဘက်က တရားစီရင်ချက် ချတာ မှားနေတယ်ဆိုပြီး စာ ပြန်တင်တယ်။ ဒီကလေး အမေ ပါဝင်ပြီး တရားစီရင်ချက် ချဖို့တော့ ပြောထားတယ်။ ဘယ်လို ဖြစ်လာမလဲတော့ မသိဘူး” လို့ သူက ရှင်းပြပါတယ်။
အခုလို အမိန့်ချတာကို ပွင့်လင်းမြင်သာမှုရှိဖို့နဲ့ အမိန့်ချမှတ်တဲ့နေရာမှာလည်း သက်ဆိုင်သူ ပါဝင်ဖို့ ဒေသခံတွေက တောင်းဆိုနေကြပါတယ်။
ပြီးခဲ့တဲ့ ၂၀၂၄ ဒီဇင်ဘာ ၁ ရက်က MNDAA ထိန်းချုပ်ထားတဲ့ ကြူကုတ်ပန်ဆိုင်းမြို့ရှိ ကျူးမြန့် ဝင်းထဲ နေထိုင်တဲ့ MNDAA တပ်သား အသက် ၄၀ ကျော်အရွယ် ချင်းရှောက်ဆိုသူက ၂ နှစ်နဲ့ ၅ လအရွယ် ကလေးငယ်ကို အဓမ္မ ပြုကျင့်ခဲ့တာပဲ ဖြစ်ပါတယ်။
