ပို့လဘား၊ ဖေဖော်ဝါရီ ၁၉ ရက်၊ မုံးစီး
ကွတ်ခိုင်မြို့နယ် မုံးစီးဒေသ ဆိုင်းခေါင်ကျေးရွာမှာ ကလေးငယ် ၂ ဦး ဗုံး ယူဆော့ကစားမိရာကနေ ပေါက်ကွဲမှုဖြစ်ပြီး တစ်ဦး သေဆုံးကာ တစ်ဦး ထိခိုက်ဒဏ်ရာ ရရှိခဲ့တယ်လို့ ဒေသခံတစ်ဦးက ရွှေဖီမြေကို ပြောပါတယ်။
ဒီနေ့ ဖေဖော်ဝါရီ ၁၉ ရက် မနက် ၉ နာရီဝန်းကျင်မှာ ကလေးငယ် ၂ ဦးက M9 ဗုံးသီးအမျိုးအစားကို ယူကစားရာကနေ ပေါက်ကွဲမှု ဖြစ်ပွားခဲ့တာလို့ ဆိုပါတယ်။
“သူတို့ဘေးအိမ်က အဒေါ်တစ်ယောက် အဲဗုံးကို ဘယ်ကနေ ယူလာလဲတော့ မသိဘူး။ သူ့အိမ်မှာရှိတဲ့ ကုတင်အောက် ထား ထားတာ။ အဲကလေးနှစ်ယောက်က သူ့အိမ်မှာ သွားမွှေတာပေါ့။ ကလေးဆိုတော့လေ သူများအိမ်မှာ မွှေတတ်တယ်။ သူတို့နှစ်ယောက် မွှေရင်းနဲ့ အဲဗုံးကို တွေ့ပြီး ယူသွားလိုက်တာ။ သူတို့အိမ်ဘေးမှာ အဲဗုံးကို ခွဲလိုက်တာပေါ့။ ဗုံးက ပေါက်ပြီး တစ်ယောက်က ပွဲချင်းသေဆုံးသွားပြီး တစ်ယောက်ကတော့ ဒဏ်ရာ ရတယ်”
သေဆုံးသွားတဲ့ ကလေးငယ်ဟာ အသက် ၁၂ နှစ်အရွယ် မိုင်းညီလင်းထက်ဖြစ်ပြီး ထိခိုက်ဒဏ်ရာ ရသူကတော့ ၁၂ နှစ်အရွယ် မိုင်းအိုက်ကယ် ဖြစ်ပါတယ်။
ပြီးခဲ့တဲ့ ဇန်နဝါရီလအတွင်း ရွှေဖီမြေက ရရှိထားတဲ့ စာရင်းအရ မြေမြှုပ်မိုင်း နင်းမိသူ ၅ ဦး ရှိပါတယ်။
ပြီးခဲ့တဲ့ ဖေဖော်ဝါရီ ၂ ရက်ကလည်း ကွတ်ခိုင်မြို့နယ် နမ့်ဆိုင်ရွာမှာ လက်လုပ်မိုင်းပေါက်ကွဲမှုကြောင့် ကလေး ၂ ဦး သေဆုံးပြီး ၂ ဦး ထိခိုက်ဒဏ်ရာ ရရှိခဲ့ပါတယ်။
