ပို့လဘား၊ စက်တင်ဘာ ၁၈ ရက်
ကရင်အမျိုးသားအစည်းအရုံး KNU ထိန်းချုပ်ထားတဲ့ တနင်္သာရီတိုင်း မြိတ်ထားဝယ်ခရိုင်မှာ စစ်ကောင်စီတပ်က ကြားဖြတ်တိုက်ခိုက်ခံရပြီး စစ်ကောင်စီတပ်သား ၁၀ ဦး သေဆုံးပြီး ၁၅ ဦး ထိခိုက်ဒဏ်ရာရရှိခဲ့တယ်လို့ KNU က ဒီနေ့ စက်တင်ဘာ ၁၈ ရက်မှာ ထုတ်ပြန်ထားပါတယ်။
ကျောက်မဲတောင်စခန်းကဘက်နေ ထားဝယ်မြို့ဘက်ကို စစ်ကြောင်းထိုးလာတဲ့ စစ်ကောင်စီတပ်သား ၁၀၀ ဝန်းကျင်ကို ကရင်အမျိုးသားတပ်မတော် KNLA တပ်မဟာ (၁၄) တပ်ရင်း (၁၂) က ပြီးခဲ့တဲ့ စက်တင်ဘာ ၁၄ ရက်မှာ ကြားဖြတ်တိုက်ခိုက်ခဲ့တာ ဖြစ်ပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီး က “သူတို့ တပ်ချိန်းတဲ့အချိန်မှာပေါ့နော်။ ကျောက်မဲတောင်ကနေ ထားဝယ်ဘက်ကို ပြန်ဆင်းမယ်။ ထားဝယ်ဘက်ကနေ ကျောက်မဲတောင်ဘက်ကို ပြန်တက်လာတဲ့ စစ်ကောင်စီတပ်သား ၁၀၀ ဝန်းကျင်ရှိမယ်။ အဲမှာ တော်လှန်ရေးတပ်တွေက ထားဝယ်ဘက်ကို တက်လာတဲ့ သူတွေကို ကြားဝင်တိုက်ခဲ့တယ်။ ပကာရီကျေးရွာမှာလည်း တိုက်ပွဲ ဖြစ်ပွားခဲ့တယ်” လို့ ပြောပါတယ်။
အဆိုပါ ကြားဖြတ်တိုက်ခိုက်ခံခဲ့တာကြောင့် စစ်ကောင်စီတပ်သား ၁၀ ဦး သေဆုံးပြီး ၁၅ ဦး ခန့် ထိခိုက်ဒဏ်ရာရရှိကာ MA-1 (၁) လက်အပါအဝင် လက်နက်ခဲယမ်း အချို့လည်း သိမ်းဆည်းရမိခဲ့တယ်လို့ ဆိုပါတယ်။
ဒါ့အပြင် ထားဝယ်မြို့နယ် ပကာရီကျေးရွာဘက်ကို စစ်ကြောင်းထိုးနေတဲ့ စစ်ကောင်စီတပ်က စစ်မှုထမ်း သင်တန်းဆင်း တပ်သား တစ်ဦးကလည်း ဓဝယ် အမျိုးသားလွတ်မြောက်ရေးတပ်မတော် DNLA ထံ လက်နက်ခဲယမ်းတွေနဲ့အတူ အလင်းဝင်လာတယ်လို့ DNLA က ထုတ်ပြန်ထားပါတယ်။
ပြီးခဲ့တဲ့ ဇူလိုင် ၃၀ ရက်ကလည်း ပဲခူးတိုင်း တောင်ငူခရိုင် ပဲခူးရိုးမအတွင်းရှိ ဆွာဆည် ရှင်းလင်းဆောင်မှာ စစ်ကောင်စီတပ်စခန်းကို တော်လှန်ရေးတပ်တွေက ဝင်ရောက်တိုက်ခိုက်ပြီး ဗိုလ်ကြီး ၁ ဦး အပါအဝင် ၆ ဦး သေဆုံးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
