မိုင်းရူပ၊ ဖေဖော်ဝါရီ ၇ ရက်၊ ဘော်လခဲ
ကရင်နီပြည် ဘော်လခဲမြို့နယ် နမ်းဖဲကျေးရွာအုပ်စုထဲ စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်ခဲ့ရာ အမျိုးသမီးတစ်ဦး သေဆုံးသွားတယ်လို့ ရွှေဖီမြေက စုံစမ်းသိရှိရပါတယ်။
မနေ့ ဖေဖော်ဝါရီ ၆ ရက် ည ၉ နာရီဝန်းကျင်မှာ နမ်းဖဲကျေးရွာအုပ်စုရှိ ကျေးရွာတစ်ရွာထဲက စျေးဆိုင်ကို ဂျက်ဖိုက်တာနဲ့ ဗုံးကြဲတိုက်ခိုက်ခဲ့ရာ စျေးရောင်းနေတဲ့ အမျိုးသမီးတစ်ဦး သေဆုံးသွားခဲ့ပါတယ်။
“ဂျက်ဖိုက်တာနဲ့ ၁ ကြိမ် လာကြဲသွားတာ။ စျေးရောင်းတဲ့ အမျိုးသမီးတစ်ဦး သေဆုံးခဲ့ပါတယ်” လို့ ကရင်နီအမျိုးသားများကာကွယ်ရေးတပ်- KNDF ရဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
စစ်တပ်ရဲ့ လေကြောင်း တိုက်ခိုက်မှုကြောင့် နေအိမ်အချို့လည်း ထိခိုက်ပျက်စီးခဲ့တယ်လို့ သိရပါတယ်။
ပြီးခဲ့တဲ့ ဇန်နဝါရီလကစပြီး ကရင်နီပြည်မှာ လေကြောင်း တိုက်ခိုက်မှု အရင်ကထက် ပိုမိုလုပ်ဆောင်လာတာ တွေ့ရပြီး အရပ်သား သေဆုံးမှုလည်း နေ့စဥ်လိုလို တိုးလာနေပါတယ်။
ဇန်နဝါရီ ၃၁ ရက်မှာလည်း ဘော်လခဲမြို့နယ် ချိကွဲ့ရွာကို လေကြောင်းနဲ့ ဗုံးကြဲတိုက်ခိုက်ခဲ့ရာ အသက် ၅၀ ဝန်းကျင်အမျိုးသမီးတစ်ဦး သေဆုံးခဲ့ပါတယ်။
စစ်တပ်ဘက်ကတော့ ဘော်လခဲမြို့နယ်မှာ လေကြောင်း အသုံးပြုပြီး တိုက်ခိုက်ခဲ့တာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
ပြီးခဲ့တဲ့ ဇန်နဝါရီအတွင်း စစ်တပ်ရဲ့ လေကြောင်းနဲ့ လက်နက်ကြီးကြောင့် ကလေးငယ် ၂ ဦးအပါအဝင် အရပ်သား ၆ ဦး သေဆုံးပြီး ၁၆ ဦး ထိခိုက်ဒဏ်ရာ ရခဲ့တယ်လို့ ကရင်နီ လူမှုအသင်းအဖွဲ့များကွန်ရက်- KCSN က ပြီးခဲ့တဲ့ ဖေဖော်ဝါရီ ၅ ရက်မှာ ထုတ်ပြန်ထားပါတယ်။
