ရဲမာန်၊ နိုဝင်ဘာ ၁၁ ရက်၊ ကနီ
စစ်ကိုင်းတိုင်း ကနီမြို့မြောက်ခြမ်း ဝင်းမနားရွာက ဆေးရုံတစ်ခုကို စစ်ကောင်စီတပ်က စက်တပ်လေထီးနဲ့ ဗုံးကြဲတိုက်ခိုက်ခဲ့တာကြောင့် လူနာ ၈ ဦး သေဆုံးခဲ့တယ်လို့ ဒေသခံ ကိုဂျိုးဖြူက ရွှေဖီမြေကို ပြောပါတယ်။
ဒီနေ့ နိုဝင်ဘာ ၁၁ ရက် မနက် ၉ နာရီဝန်းကျင်မှာ စက်တပ်လေထီး ပါရာမိုတာနဲ့ ဗုံးသီး ၄ လုံး ကြဲချတိုက်ခိုက်ခဲ့တယ်လို့ ၎င်းက ပြောပါတယ်။
“ကနီနယ် ဝင်မနားရွာကဆေးခန်း လူနာဆောင်ပေါ် ကျတာလို့ ကြားတယ်။ ပါရာမိုတာ ၂ စီးနဲ့ ဗုံးသီး ၄ လုံး ချတာ။ ညနေကလည်း ပါရာ ၁ စီး လာဝဲသေးတယ်။ ဒီနေ့မှ လာတက်တဲ့ လင်မယားနှစ်ယောက်လည်း ပါသွားတယ်တဲ့။ ကျားမ အတိအကျ မသိသေးဘူးဗျ”
မနေ့ နိုဝင်ဘာ ၁၀ ရက် နေ့လယ်ပိုင်းမှာ စစ်တပ်က ဒီပဲယင်းမြို့နယ် ဆပ်ပြာကျင်းနဲ့ ကျွန်းတောလေးရွာကို ဂျက်ဖိုက်တာနဲ့ ဗုံး ၅ ကြိမ် ကြဲချတိုက်ခိုက်ခဲ့တာကြောင့် အရပ်သားတချို့ ထိခိုက်ဒဏ်ရာ ရရှိခဲ့တယ်လို့ သိရပါတယ်။
ပြီးခဲ့တဲ့ ဖေဖော်ဝါရီ ၁၈ ရက် ညနေ ၄ နာရီခန့်မှာ ကနီမြို့နယ် ချောင်းမရွာကို စစ်တပ်က စက်တပ်လေထီး (Paramotor)နဲ့ ဗုံးကြဲတိုက်ခိုက်ခဲ့တာကြောင့် အရပ်သား ၅ ဦး သေဆုံးပြီး ၂၀ ကျော် ထိခိုက်ဒဏ်ရာ ရရှိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
