လွေးလာဝ်ဇာရ်၊ အောက်တိုဘာ ၁၇ ရက်၊ နမ့်ဆန်
တအာင်းတပ် – PSLF/TNLA ထိန်းချုပ်ထားတဲ့ နမ့်ဆန်မြို့နယ် ဟိုမိန်းရွာထဲက စစ်ကောင်စီတပ်ရဲ့ ဗုံးကြဲတိုက်ခိုက်မှုမှာ ဒေသခံ ၃ ဦး ပွဲချင်းပြီး သေဆုံးသွားခဲ့တယ်လို့ ဖြစ်စဉ်သိရှိသူ အမျိုးသမီးတစ်ဦးဆီက သိရပါတယ်။
ဒီနေ့ အောက်တိုဘာလ ၁၇ ရက် မနက် ၇ နာရီကျော်မှာ စစ်ကောင်စီတပ်က ဂျက်ဖိုက်တာလေယာဉ်နဲ့ ပေါင် ၂၅၀ ဗုံးနှစ်လုံး ကြဲတိုက်ခိုက်မှု ပြုလုပ်ခဲ့တာကြောင့် ဒေသခံ ၃ ဦး သေဆုံးသွားတဲ့အပြင် နေအိမ် ၃ လုံးထက်မနည်းလည်း ထိမှန်ပျက်ဆီးခဲ့တယ်လို့ ဆိုပါတယ်။
“၃ ယောက်သေသွားတာ။ ဦးလေးကြီး တစ်ယောက်နဲ့ အမျိုးသမီး နှစ်ယောက် သေသွားတယ်။ နေအိမ်ကတော့ ၃ လုံးက ဘာမှရစရာမရှိတော့ဘူး။ ကျန်တဲ့အိမ်တွေလည်း ထိတယ်” လို့ ပြောပါတယ်။
စစ်ကောင်စီကြဲချခဲ့တဲ့ ဗုံး ၂ လုံးဟာ ဟိုမိန်းကျေးရွာထဲမှာ ကျရောက်ပေါက်ကွဲခဲ့တာကြောင့် သေဆုံးသွားသူတွေဟာ အမျိုးသား တစ်ဦး၊ အသက် ၁၈ နှစ်အရွယ် အမျိုးသမီး ၁ဦးနဲ့ အသက် ၁၉ နှစ်အရွယ် အမျိုးသမီး ၁ ဦးတို့ ဖြစ်ပါတယ်။
ဒီနေ့ အောက်တိုဘာ ၁၇ ရက် မနက် ၈ နာရီကျော်မှာ နမ္မတူမြို့မှာရှိတဲ့ အ.ထ.က (၁) ကျောင်းအနားမှာ စစ်ကောင်စီတပ်က အဲဒီဂျက်ဖိုက်တာလေယာဉ်ပဲ ထပ်မံဗုံးကြဲတိုက်ခိုက်ခဲ့လို့ အမျိုးသမီး ၃ ဦးဒဏ်ရာရရှိခဲ့ပါတယ်။
ပြီးခဲ့တဲ့ အောက်တိုဘာ ၁၄ ရက်မှာလည်း နမ့်ဆန်မြို့နယ် အုမ်းမစွမ်ကျေးရွာထဲကို လေယာဉ်နဲ့ ဗုံးကြဲတိုက်ခိုက်ခဲ့လို့ ကလေး ၂ ဦး သေဆုံးခဲ့ပြီး ၃ ဒဏ်ရာရရှိခဲ့ပါတယ်။
၂ ပတ်ကျော်အတွင်း စစ်ကောင်စီရဲ့ ဗုံးကြဲတိုက်ခိုက်မှုကြောင့် ရွှေဖီမြေက ရရှိထားတဲ့စာရင်းအရ TNLA ထိန်းချုပ်ဒေသမှာ သေဆုံးသူ ကလေး ၆ ဦးအပါအဝင် ၃၆ ဦးသေဆုံးခဲ့ပြီး ကလေး ၁၀ ဦးအပါအဝင် ၄၀ ဦး ထိခိုက်ဒဏ်ရာရခဲ့ပါတယ်။
တအာင်းတပ်ဘက်ကတော့ စစ်ကောင်စီတပ်က ဒရုန်း၊ လက်နက်ကြီးနဲ့ လေကြောင်းအသုံးပြုပြီး အရပ်သားလူထုအပေါ် စစ်ရာဇဝတ်မှု ကျူးလွန်နေတာဖြစ်ပြီး လူထုအနေနဲ့ စစ်ရေးသတိရှိကြဖို့ တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
