ခိုင်လေး၊ ဖေဖော်ဝါရီ ၁၅ ရက်၊ မင်းလှ
ပဲခူးတိုင်း သာယာဝတီခရိုင် မင်းလှမြို့နယ် ခွက်မအုပ်စု ဇရစ်မျှောင်ရွာက အုပ်ချုပ်ရေးမှူး ဦးသန်းထွေးကို သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ရဲဘော်တွေက ပစ်ခတ်ရှင်းလင်းခဲ့တယ်လို့ တပ်ခွဲ ၂ မှ တာဝန်ရှိသူတစ်ဦးက ရွှေဖီမြေကို ပြောပါတယ်။
ဦးသန်းထွေးဆိုသူကို ဒီနေ့ ဖေဖော်ဝါရီ ၁၅ ရက် နေ့လယ် ၂ နာရီခွဲမှာ တပ်ခွဲ ၂ မှ ရဲဘော်တွေက ရင်ဘတ်ကို ၁ ချက်နဲ့ ခေါင်းကို ၁ ချက် ပစ်ခတ်ခဲ့တာလို့ ဆိုပါတယ်။
“တစ်အိမ်ကို သုံးသောင်း ကောက်တာပါ။ မုဆိုးမအိမ် သက်ကြီးရွယ်အို အိမ်ပါမကျန် ပေးရပါတယ်။ စစ်မှုထမ်းကြေးဆိုပြီး ပြည်သူတွေဆီက အတင်းအကြပ် ကောက်တယ်။ မပေးရင် ဖမ်းမယ်ဆီးမယ်က ခြိမ်းခြောက်တယ်။ မရှိလို့ တောထဲ တက်ပြီး သစ်ဝါး ခုတ်စားရတဲ့ ဆိုင်ကယ်သမားတွေဆီကလည်း ဆက်ကြေး ကောက်တယ်”
ဒေသခံတွေရဲ့ တိုင်ကြားမှုကြောင့် ဦးသန်းထွေးထံ ဖုန်းဆက်ကာ သတိပေးခဲ့ပေမဲ့ စစ်မှုထမ်းကြေး ကောက်တာကို အရင်ကထက် ပိုလုပ်လာတာကြောင့် အခုလို လုပ်ဆောင်ရတာ ဖြစ်တယ်လို့ ဆိုပါတယ်။
၎င်းနဲ့အတူ ဖုန်း ၁ လုံး၊ ဆိုင်ကယ် ၁ စီး၊ စည်းတံဆိပ်တုံး ၂ ခုနဲ့ ထောက်ခံစာလည်း သိမ်းဆည်းရမိခဲ့ပါတယ်။
ပြီးခဲ့တဲ့ ဖေဖော်ဝါရီ ၁၁ ရက်ကလည်း လက်ပံတန်းမှာ ဒေသခံဆီကနေ စစ်မှုထမ်းကြေး လိုက်ကောက်နေတဲ့ အုပ်ချုပ်ရေးမှူးနဲ့ ဇနီးဖြစ်သူကို ရွှေတန်းမြေ ပြည်သူ့ကာကွယ်ရေးတပ်ဖွဲ့က သေနတ်နဲ့ ပစ်ခတ်တာကြောင့် ပွဲချင်းပြီး သေဆုံးခဲ့ပါတယ်။
ဒေသခံနဲ့ တော်လှန်ရေးတပ်ဖွဲ့တွေကို ဒုက္ခပေးနေကြတဲ့ စစ်တပ်နဲ့ စစ်တပ် ထောက်တိုင်တွေကို အရှိန်မြင့် တိုက်ခိုက်သွားမှာဖြစ်တာကြောင့် ဒေသခံတွေအနေနဲ့ စစ်တပ်အနီး သွားလာနေထိုင်တာတွေ မပြုလုပ်ကြဖို့လည်း အသိပေးထားပါတယ်။
