အင်းငယ်၊ ဖေဖော်ဝါရီ ၂၈ ရက်၊ တောင်ကြီး
ရှမ်းတောင် တောင်ကြီးမြို့မှာ ဒီနေ့ ဖေဖော်ဝါရီ ၂၈ ရက် မနက် ၆ နာရီခန့်က သူခိုးတစ်ဦးကို ဖမ်းဆီးနိုင်ခဲ့ပေမဲ့ ပြန်လည် လွတ်မြောက်သွားပါတယ်။
တောင်ကြီးမြို့ မြို့မဈေးတစ်နေရာမှာ ဟိုက်ဂျက်ကားပေါ်က အထုပ်တွေကို ခိုးယူနေချိန် ဈေးသည်အဖွဲ့က လက်ပူးလက်ကြပ် ဖမ်းဆီးနိုင်ခဲ့တာလို့ ဆိုပါတယ်။
ဈေးသည် အမျိုးသားတစ်ဦးက “သူခိုးဆိုတာ ဟိုလို ဆိုင်ကယ်တွေ ကားတွေ အကြီးစား လိုက်ခိုးတာ မဟုတ်ပါဘူး။ ဟိုဆိုင်ဝင်၊ ဒီဆိုင်ဝင် ကြက်သွန်တွေ၊ ဘာညာတွေ အလစ် သုတ်တာပါ။ မှတ်လောက်သားလောက်အောင် ဓာတ်တိုင်မှာ ချည်ထားပြီးမှ အကုန်လုံးက ဝိုင်းသနားကြလို့ ပြန်လွှတ်ပေးလိုက်ပါတယ်” လို့ ပြောပါတယ်။
သူခိုးကို စစ်မေးပြီးနောက် ရဲစခန်းအပ်ဖို့ စီစဉ်ရာမှာ ဈေးသည်တွေဘက်က ငွေကြေးကုန်ကျမှု ရှိမှာ၊ အလှုပ်ရှုပ်မှာကို စိုးရိမ်တာကြောင့် ပြန်လွှတ်ပေးလိုက်တယ်လို့ သိရပါတယ်။
“စစ်မေးချက်အရတော့ တော်တော်များများ ခိုးပြီးပြီလို့ ဝန်ခံတယ်။ ကားတံခါးလည်း ဖွင့်တတ်တယ်။ သူ့အဖေ လက်ထက်ကတည်းက သူခိုးလို့ သိရတယ်” လို့ ဈေးသည် အမျိုးသားတစ်ဦးက ဆက်ပြောပါတယ်။
စစ်အာဏာသိမ်းပြီးနောက်ပိုင်း တောင်ကြီးမြို့မှာ သူခိုး အများစုကို ဖမ်းမိပြီး ရဲလက်အပ်ခဲ့ကြပေမဲ့ ရဲက အမှုမဖွင့်ဘဲ ပြန်လွှတ်ပေးတဲ့အပြင် ပြစ်ဒဏ် ကျခံနေတဲ့ ရာဇဝတ်သားတွေကိုလည်း တစ်နှစ်တစ်ခါ လွှတ်ငြိမ်းခွင့်နဲ့ ပြန်လွှတ်ပေးနေကြတယ်လို့ မြို့ခံတွေက ပြောဆိုပါတယ်။
တောင်ကြီးမြို့မှာ ၁၀၂၇ စစ်ဆင်ရေး ဒုတိယပိုင်း ပြီးဆုံးချိန်ကတည်းက ပြည်သူ့စစ်အဖွဲ့ များလာပြီး လက်ရှိ ဖြစ်ပွားနေတဲ့ ခိုးမှု၊ လူယက်မှု၊ ပြန်ပေးဆွဲမှုတွေလည်း တိုးလာနေပါတယ်။
