မိုင်းရူပ၊ စက်တင်ဘာ ၁၆ ရက်၊ မိုးကုတ်
တအာင်းတပ်မတော်-PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ပေါ်ရှိ KTVနဲ့ အနှိပ်ခန်းဆိုင်အားလုံးကို ရက်အကန့်အတ်မရှိ ပိတ်ပင်လိုက်ကြောင်း ရွှေဖီမြေက စုံစမ်းသိရှိရပါတယ်။
မိုးကုတ်မြို့ပေါ်ရှိ KTVနဲ့ အနှိပ်ခန်း ဆိုင်တွေကို တအာင်းတပ်ရဲ့ ရဲတပ်ဖွဲ့ဘက်က ပိတ်ပင်ဖို့ လိုက်လံသတိပေးပြီးနောက်၊ ပြီးခဲ့တဲ့ စက်တင်ဘာ ၁၃ ရက်ကစပြီး KTV ဆိုင်အားလုံး ပိတ်ထားကြောင်း မိုးကုတ်ဒေသခံအမျိုးသားတစ်ဦးက ရွှေဖီမြေကို ပြောပါတယ်။
“KTV တွေအားလုံး ပိတ်လိုက်ပြီ။ အဲမှာ အလုပ်လုပ်တဲ့ အမျိုးသမီးတွေကိုလည်း ပြန်ခိုင်းထားတယ်လို့ ကြားတယ်” လို့ ဆိုပါတယ်။
ရွှေဖီမြေက ရရှိထားတဲ့ စာရင်းအရ မိုးကုတ်မြို့ပေါ်မှာ KTV ဆိုင် ၇ ခုရှိပြီး တအာင်းတပ်ထိန်းချုပ်ထားတဲ့ ဒေသတွေမှာရှိတဲ့ KTV ဆိုင်အားလုံးကို ပိတ်ဖို့ ညွှန်ကြားထားတယ်လို့ သိရပါတယ်။
တအာင်းတပ်ထိန်းချုပ်ထားတဲ့ ဒေသမှာ KTV ဆိုင်တွေ ပိတ်လိုက်တဲ့အပေါ် လူထုအများစု ထောက်ခံကြပြီး တော်လှန်ရေး ကာလပြီးဆုံးသည့်အထိ ပိတ်ပင်ထားဖို့ လူထုတွေက တောင်းဆိုကြပါတယ်။
တအာင်းတပ်ထိန်းချုပ်ထားတဲ့ တခြားမြို့နယ်တွေဖြစ်တဲ့ ကျောက်မဲ၊ နမ္မတူနဲ့ နမ့်ခမ်းမြို့နယ်တွေမှာလည်း KTV ဆိုင်တွေ ပိတ်ထားလိုက်ပြီလို့ ဒေသခံတွေက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
