အိုက်ပွီး၊ သြဂုတ် ၁၇ ရက်၊ ကန်ပက်လက်
ချင်းညီနောင်အဖွဲ့- CB ထိန်းချုပ်ထားတဲ့ ချင်းပြည်နယ် ကန်ပက်လက်မြို့ပေါ်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ လူနေအိမ် ၅ လုံး ထိခိုက်ပျက်စီးသွားတယ်လို့ ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
ကန်ပက်လက်မြို့ပေါ်နှစ်နေရာကို နေပြည်တော် အေလာလေတပ်ကနေ တက်လာတဲ့ ဂျက်ဖိုက်တာတစ်စီးနဲ့ ဒီနေ့ သြဂုတ် ၁၇ ရက် မနက် ၆ နာရီ ၅၅ မိနစ်မှာ ဗုံးသီးနှစ်လုံး ကြဲချတိုက်ခိုက်သွားတာပဲ ဖြစ်ပါတယ်။
“ဂျက်ဖိုက်တာတစ်စီးနဲ့ မြို့ထဲက နှစ်နေရာလောက်ကို ဗုံးနှစ်လုံး ကြဲသွားတာပါ။ လူနေအိမ် သုံးလုံးက လုံးဝ ပျက်စီးသွားပါတယ်။ အဲအနီးနားက နှစ်အိမ်ကလည်း ပျက်စီးသွားတယ်။ တခြားအိမ်တွေလည်း ပျက်စီးမှုရှိတယ်။ လူထိခိုက်မှု မရှိဘူး” လို့ ကန်ပက်လက်ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
လေကြောင်းကနေ ဗုံးကြဲတဲ့နေရာဟာ လူ ရှိမနေတဲ့အတွက် အရပ်သား ထိခိုက်မှု မရှိဘူးလို့ သိရပါတယ်။
ကန်ပက်လက်မြို့နယ်အပါအဝင် တော်လှန်ရေးတပ်ဖွဲ့တွေ ထိန်းချုပ်ထားတဲ့ ချင်းပြည်နယ်တောင်ပိုင်းက မြို့နယ်တွေမှာ ဒီရက်ပိုင်း ကင်းထောက်လေယာဉ်တွေနဲ့ မကြာခဏ စောင့်ကြည့်နေတယ်လို့ ဆိုပါတယ်။
“အခုတလော လေယာဉ်တွေက တောက်လျှောက် လာနေပါတယ်။ ညဘက်ဆိုလည်း လေယာဉ်သံတွေ ကြားနေရတယ်။ တခါတလေ လေယာဉ်တွေတောင် မြင်နေရတယ်။ ဘယ်နေ့ ဗုံးကြဲမလဲဆိုတာ ရင်တထိတ်ထိတ်နဲ့ အိပ်နေရတယ်” လို့ မတူပီမြို့နယ် ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
စစ်တပ်က ကန်ပက်လက်မြို့နယ်အပါအဝင် မင်းတပ်၊ မတူပီ၊ ပလက်ဝ၊ ထန်တလန်၊ ဖလမ်း၊ တွန်းဇံ စတဲ့တော်လှန်ရေးတပ်ဖွဲ့တွေ ထိန်းချုပ်ထားတဲ့ မြို့နယ်တွေကို အရေးပေါ်အခြေအနေ ကြေညာထားပါတယ်။
အဲဒီမြို့နယ်အပါအဝင် ချင်းပြည်နယ်တစ်ခုလုံး လာမယ့် ၂၀၂၅ ခုနှစ် ဒီဇင်ဘာလမှာ အထွေထွေ ရွေးကောက်ပွဲ ကျင်းပသွားမယ်လို့ ထုတ်ပြန်ချက်ထဲ ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
