အိုက်ပွီး၊ ဧပြီ ၁၃ ရက်၊ မင်းတပ်
သင်္ကြန်အကြိုနေ့ ချင်းပြည်နယ် မင်းတပ်မြို့ မြို့မနှစ်ခြင်းဘုရားကျောင်း လေကြောင်းနဲ့ ဗုံးကြဲခံရလို့ ပျက်စီးသွားကြောင်း ဒေသခံတွေက ရွှေဖီမြေသို့ ပြောပါတယ်။
ဒီနေ့ ဧပြီ ၁၃ ရက် ညနေ ၄ နာရီဝန်းကျင်မှာ ဂျက်ဖိုက်တာတစ်စီးနဲ့ ပေါင် ၅၀၀ ဗုံးသီး ကြဲချတိုက်ခိုက်ခဲ့တာပဲ ဖြစ်ပါတယ်။
“သင်္ကြန်အကြိုနေ့မှာပဲ ဗုံးကြဲသွားတယ်။ ဘုရားကျောင်းကတော့ ပျက်စီးသွားပါတယ်။ အနီးအနားက အဆောက်အဦးတချို့ ထိခိုက်ပျက်စီးတယ်” လို့ မင်းတပ်မြို့ခံ အမျိုးသားတစ်ဦးက ရွှေဖီမြေသို့ ပြောပါတယ်။
ဗုံးကြဲ တိုက်ခိုက်ခံရလို့ ပျက်စီးသွားတဲ့ အဆောက်အဦးတွေကို ရပ်ကွက်နေ လူထုတွေက ဒီနေ့ညနေပိုင်းမှာ သန့်ရှင်းရေး လုပ်ဆောင်ခဲ့တယ်လို့ ဆိုပါတယ်။
“လူ ထိခိုက်မှုတော့ မရှိလောက်ဘူး။ ကျနော်တို့ မကြည့်ရဲသေးဘူး။ ညနေပိုင်းမှာ ဘုရားကျောင်းထဲကပစ္စည်းတွေ တခြားတစ်နေရာ ပြောင်းရွှေ့တာ၊ သန့်ရှင်းရေး လုပ်တာ တွေ့တယ်” လို့ မင်းတပ်မြို့ခံအမျိုးသားတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ ဧပြီ ၉ ရက်ကလည်း မင်းတပ်မြို့နယ် ဖွီကျေးရွာကို စစ်ကောင်စီတပ် လေကြောင်းနဲ့ ဗုံးကြဲတိုက်ခိုက်လို့ ဓမ္မဆရာအပါအဝင် အရပ်သား ၆ ဦး သေဆုံးခဲ့ပါတယ်။
