အိုက်ပွီး၊ ဧပြီ ၁၇ ရက်၊ မင်းတပ်
ချင်းပြည်နယ် မင်းတပ်မြို့မှာ မနေ့ ဧပြီ ၁၆ ရက် ညနေ ၅ နာရီ ၂၀ မိနစ်ခန့်က စစ်ကောင်စီတပ် လေကြောင်းကနေ ဗုံးကြဲတိုက်ခိုက်ခဲ့လို့ လူနေအိမ် ၇ လုံး ပျက်စီးသွားတယ်လို့ ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
မင်းတပ်မြို့ပြင်တစ်နေရာကို ပေါင် ၂၅၀ ဗုံးသီးနှစ်လုံးနဲ့ တစ်နေရာတည်းမှာ အကြောင်းမဲ့ လေကြောင်းကနေ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“အိမ်ရှင်တွေ စစ်ဘေးရှောင်ကြတယ်။ အိမ်မှာ ဘယ်သူမှ မရှိကြတော့ လူထိခိုက်သေဆုံးမှုက မရှိဘူး။ ဒါပေမဲ့ အိမ်တွေက အတော်လေးကို ပျက်စီးသွားတယ်။ ပြန်ပြုပြင်ရမယ်။ တစ်နေရာတည်းကိုပဲ ဗုံးသီးနှစ်ကြိမ် ကြဲသွားတာပါ”
မင်းတပ်မြို့မှာ စစ်တပ်က ဒီရက်ပိုင်း လေကြောင်း ဗုံးကြဲတိုက်ခိုက်မှုတွေ ဆက်တိုက် ပြုလုပ်နေတယ်လို့ ဒေသခံတစ်ဦးက ရွှေဖီမြေသို့ ပြောပါတယ်။
“မနေ့က လေကြောင်း တိုက်ခိုက်မှုနဲ့ဆိုရင် သင်္ကြန်ကာလမှာ လေကြောင်း တိုက်ခိုက်တာ နှစ်ကြိမ် ရှိသွားပြီ။ အခုထိ လေယာဉ်က တောက်လျှောက် လာနေသေးတယ်။ မြို့ထဲက လူတွေလည်း မြို့မှာ မနေရဲတော့လို့ ပြန်ပြေးနေရတယ်”
ဧပြီ ၁၃ ရက် သင်္ကြန်အကြိုနေ့ကလည်း မင်းတပ်မြို့မနှစ်ခြင်းဘုရားကျောင်း လေကြောင်းကနေ တိုက်ခိုက်ခံရပြီး ဘုရားကျောင်းအပါအဝင် အဆောက်အဦးတချို့ ပျက်စီးသွားပါတယ်။
