အိုက်ပွီး၊ ဧပြီ ၃ ရက်၊ ကန်ပက်လက်
ချင်းပြည်နယ် ကန်ပက်လက်မြို့မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အရပ်သားနေအိမ် ၅ လုံးအပါအဝင် အစိုးရအဆောက်အဦး ၂၀ လုံး ပျက်စီးခဲ့တယ်လို့ ကန်ပက်လက်မြို့နယ် (ပကဖ)က မနေ့ ဧပြီ ၂ ရက်က ထုတ်ပြန်ပါတယ်။
မနေ့ နေ့လယ် ၁ နာရီ ၁၅ မိနစ်မှာ ကန်ပက်မြို့ နေရာအနှံ့ကို စစ်တပ်က လေကြောင်းနဲ့ အကြိမ်ကြိမ် ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“ဗုံးကြဲတာတော့ တောက်လျှောက်ဆိုတော့ ဘယ်နှစ်လုံးမှန်း မသိဘူး။ မြို့အနှံ့ပတ်လည် ကြဲသွားပါတယ်။ အဆောက်အဦး ထိခိုက်ပျက်စီးမှုတော့ အတော်လေး များပါတယ်” လို့ ကန်ပက်လက်မြို့ခံတစ်ဦးက ရွှေဖီမြေသို့ ပြောပါတယ်။
မနေ့ လေကြောင်း ဗုံးကြဲတိုက်ခိုက်တာဟာ အစိုးရအဆောက်အဦးတွေကို ဦးတည် တိုက်ခိုက်ခဲ့တာလို့ ဆိုပါတယ်။
“မြို့ထဲက အစိုးရအဆောက်အဦးတွေကိုပဲ တိုက်ခိုက်နေတာ ဖြစ်ပါတယ်။ ပျက်စီးတဲ့နေအိမ်တွေကလည်း အဲဒီအစိုးရရုံးအနီးအနားက နေအိမ်တွေပဲ ဖြစ်ပါတယ်” လို့ နောက်ထပ် ကန်ပက်လက်မြို့ခံတစ်ဦးက ရွှေဖီမြေသို့ ပြောပါတယ်။
လေကြောင်း ဗုံးကြဲတိုက်ခိုက်မှုကြောင့် နေအိမ် ၅ လုံး၊ ထွေအုပ်ရုံး ၈ လုံး၊ ခေါနူးသုမ်ရိပ်သာ ၁ လုံး၊ ကျေးလက်ဦးစီးမှူးရုံး ၂ လုံး၊ မြို့နယ်ရွေးကောက်ပွဲကော်မရှင်ရုံး ၁ လုံး၊ မြို့နယ်ရုံး ၁ လုံးနဲ့ မြို့နယ်စီမံကိန်းရုံး ၂ လုံး ပျက်စီးသွားပါတယ်။
ဒါ့အပြင် အရပ်သား သေဆုံးမှု မရှိပေမဲ့ ထိခိုက်ဒဏ်ရာ ရရှိသူတွေ ရှိတယ်လို့ သိရပါတယ်။
ဧပြီ ၁ ရက်ကလည်း ကန်ပက်လက်မြို့နယ် လွန်ဒုံရွာကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့ပါတယ်။
