ရွှေဖီမြေ၊ ဧပြီ ၁၃ ရက်၊ ဖယ်ခုံ
ကရင်နီပြည်နဲ့ ရှမ်းတောင် ဖယ်ခုံမြို့နယ်အတွင်း စစ်ကောင်စီတပ်ရဲ့ လေကြောင်း တိုက်ခိုက်မှုနဲ့ လက်နက်ကြီး ပစ်ခတ်မှုကြောင့် အရပ်သား ၃ ဦး သေဆုံးပြီး ၃ဝ ဦး ဒဏ်ရာ ရခဲ့ပါတယ်။
ဒဏ်ရာ ရသူတွေထဲက ၂၅ ဦးဟာ လေကြောင်း တိုက်ခိုက်မှုနဲ့ လက်နက်ကြီး ပစ်ခတ်မှုကြောင့်ဖြစ်ပြီး မြေမြှုပ်မိုင်းကြောင့် ၅ ဦး ဒဏ်ရာ ရခဲ့ကြောင်း ကရင်နီ လူမှုအသင်းအဖွဲ့များကွန်ရက်- KCSN က မနေ့ ဧပြီ ၁၂ ရက်မှာ ထုတ်ပြန်လာတာပါ။
သေဆုံးဒဏ်ရာရသူအပြင် လွိုင်ကော်မြို့နယ်ထဲက နေအိမ် ၅ အိမ်၊ ဒီးမော့ဆိုက ၁ဝ အိမ်၊ ဖယ်ခုံက ၃ဝ အိမ်နဲ့ ဖရူဆိုက ၃ အိမ် စုစုပေါင်း ၄၈ အိမ် ပျက်စီးဆုံးရှုံးခဲ့ကြောင်း ဖော်ပြထားပါတယ်။
၂ဝ၂၅ မတ်လ ၃၁ ရက်အထိ ကရင်နီပြည် လွိုင်ကော်၊ ဒီးမော့ဆို၊ ဖရူဆို၊ ဖားဆောင်း၊ ရှားတော၊ မယ်စဲ့၊ ဘောလခဲနဲ့ ဖယ်ခုံမြို့နယ်ထဲ စစ်ဘေး တိမ်းရှောင်နေရသူ (၂၈၂,၆၁၅)ဦး ရှိနေကြောင်း ဆက်လက် ဖော်ပြထားပါတယ်။
