ရဲမာန်၊ ဒီဇင်ဘာ ၆ ရက်၊ ရွှေဘို
စစ်ကိုင်းတိုင်း ရွှေဘိုမြို့နယ် သစ်ချိုပင်ရွာကို စစ်ကောင်စီတပ်က လေကြောင်းကနေ ဗုံးကြဲချတိုက်ခိုက်တာကြောင့် ၇ နှစ် ကလေးတစ်ဦးအပါအဝင် ၃ ဦး သေဆုံးခဲ့တယ်လို့ Wetlet Information Network ရဲ့ ထုတ်ပြန်ချက်အရ သိရပါတယ်။
မနေ့ ဒီဇင်ဘာ ၅ ရက် မနက် ၁ နာရီဝန်းကျင်မှာ တံတားဦးတက် ဂျက်ဖိုက်တာနဲ့ ပေါင် ၂၅၀ ဗုံး ၂ လုံး ကြဲချတိုက်ခိုက်တာကြောင့် အရပ်သား ၈ ဦးလည်း ထိခိုက်ဒဏ်ရာ ရရှိခဲ့တယ်လို့ Wetlet Information Network ရဲ့ တာဝန်ခံ ကိုနဂါးလေးက ရွှေဖီမြေကို ပြောပါတယ်။
“တစ်လုံးက ၇ နှစ်အရွယ်ကလေးအိမ်ပေါ်ကို ကျတာ။ ကလေးရော အိမ်ရော တစ်စစီ ဖြစ်သွားတယ်။ လင်မယားနှစ်ဦးဘက်ကတော့ ခါးတွေပြတ်သွားတယ်။ ပစ်သွားတဲ့နေရာမှာက တော်လှန်ရေးအင်အားစုလည်း မရှိသလို စခန်းတည်ဆောက်ထားတာလည်း မရှိဘူး။ တိုက်ပွဲဖြစ်ပွားခြင်းမရှိဘဲ အကြောင်းမဲ့သက်သက်ပစ်သွားတာ”
လေကြောင်း တိုက်ခိုက်မှုကြောင့် သေဆုံးသွားသူတွေကတော့ အသက် ၇ နှစ်အရွယ် ဝင်းလဲ့လဲ့ထွန်း၊ ၃၅ နှစ်အရွယ် ကိုမြင့်သူဝင်းနဲ့ ၃၅ နှစ်အရွယ် မမေလွမ်းသူတို့ဖြစ်တယ်လို့ ထုတ်ပြန်ထားပါတယ်။
ဗုံးကြဲတိုက်ခိုက်မှုကြောင့် အရပ်သား သေဆုံးမှုနဲ့ ဒဏ်ရာ ရရှိသူအပြင် နေအိမ် ၁၀ လုံးလည်း ပျက်စီးခဲ့တယ်လို့ ၎င်းက ဆက်ပြောပါတယ်။
“အခုရက်ပိုင်းဆို ရွှေဘိုနဲ့ ဝက်လက်မြို့နယ်တွေကို လေကြောင်းတိုက်ခိုက်မှုတွေက ညပိုင်းမှာ ပြုလုပ်နေတဲ့အခါကျတော့ ပြည်သူလူထုအနေနဲ့ မြေပြင်မှာရှိနေတဲ့ အထိုင်စက်တွေမှာ အော်ပေးနေတဲ့ လေကြောင်း တက်လာတဲ့ သတင်းရယ် လေကြောင်း တက်လာရင် ပုန်းခိုဖို့ ဗုံးခိုကျင်းတွေ တူးထားစေချင်တယ်”
ဒီဇင်ဘာ ၄ ရက်ကလည်း စစ်တပ်က စစ်ကိုင်းတိုင်း ဘုတလင်မြို့နယ်ထဲ လေကြောင်းကနေ ဗုံးကြဲတိုက်ခိုက်ခဲ့တာကြောင့် တော်လှန်ရေးရဲဘော် ၂ ဦး ကျဆုံးခဲ့ပြီး ရဲဘော် ၃ ဦးနဲ့ အရပ်သား ၄ ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
