မိုင်းရူပ၊ ဒီဇင်ဘာ ၆ ရက်၊ မိုးမိတ်
ကချင်တပ်မတော်- KIA နဲ့ ပူးပေါင်းတပ်တွေ ထိန်းချုပ်ထားတဲ့ ရှမ်းမြောက် မိုးမိတ်မြို့နယ် မြစ်ဆုံရွာကို စစ်ကောင်စီဗုံးကြဲခဲ့ပြီး အရပ်သား ၁၀ ဦးနီးပါးသေဆုံးခဲ့တယ်လို့ သိရပါတယ်။
ဒီနေ့ ဒီဇင်ဘာ ၆ ရက် မနက် ၉ နာရီဝန်းကျင်မှာ မြစ်ဆုံရွာရှိ ကျော်ရတနာဆီဆိုင်အနီးကို စစ်ကောင်စီက ဂျက်လေယာဥ် ဗုံးကြဲတိုက်ခိုက်ခဲ့ပြီး ကလေးငယ်နဲ့ ကိုယ်ဝန်ဆောင်အပါအဝင် သေဆုံးသူ ၉ ဦးရှိခဲ့တယ်လို့ မိုးမိတ်ဒေသခံတစ်ဦးက ရွှေဖီမြေကို ပြောပါတယ်။
“ကလေးငယ်တစ်ယောက် ကိုယ်ဝန်ဆောင်တစ်ယောက်ပါတယ်။ ကလေးငယ်နှစ်ယောက် ဗိုက်ပွင့်သွားတယ်။ အဒေါ်တစ်ယောက်က အပေါ်ပိုင်းဘဲတွေ့တယ်။အောက်ပိုင်းက မြစ်ထဲပါသွားတယ်။ စုစုပေါင်း ၉ ယောက်သေတယ်။ သဂြိုလ်ပြီးပြီ” လို့ ဆိုပါတယ်။
ဒါ့အပြင် စစ်ကောင်စီရဲ့ ဗုံးကြဲတိုက်ခိုက်မှုကြောင့် ဒဏ်ရာရသူတွေ အများအပြားရှိနေပြီး အရေအတွက်အတိအကျကိုတော့ မသိရသေးပါဘူး။
တအာင်းတပ်မတော်- TNLA ထိန်းချုပ်ထားတဲ့ မိုးမိတ်မြို့ကို တရုတ်အကူအညီနဲ့ စစ်ကောင်စီပြန်ရပြီးနောက် မိုးမိတ်မြို့နယ်ထဲကို စစ်ကောင်စီက ပထမဆုံးအကြိမ် ဗုံးကြဲတိုက်ခိုက်ခဲ့တာ ဖြစ်ပါတယ်။
လက်ရှိ စစ်ကောင်စီတပ်ဟာ မိုးကုတ်- မိုးမိတ်လမ်းပိုင်းကို ထိန်းချုပ်ထားသလို မိုးမိတ်- တွင်းငယ်လမ်းပိုင်း မန်းကျည်းပင်ကျေးရွာအထိ ရောက်ရှိနေပြီး မိုးမိတ်- မဘိမ်းလမ်းပိုင်းကိုတော့ KIA နဲ့ ပူးပေါင်းတပ်တွေ ထိန်းချုပ်ထားတာ ဖြစ်ပါတယ်။
ပြီးခဲ့တဲ့ ဒီဇင်ဘာ ၃ ရက် ညသန်းခေါင်းယံ ၁၂ နာရီဝန်းကျင်မှာ မန္တလေးတိုင်း မိုးကုတ်မြို့အနီး ထင်းရှူးတောင်ရွာကို စစ်ကောင်စီက ဂျက်လေယာဥ်နဲ့ ဗုံးကြဲတိုက်ခိုက်ခဲ့ပါတယ်။
စစ်ကောင်စီတပ်ဟာ တရုတ်နိုင်ငံရဲ့ ကြားဝင်မှုနဲ့ ပြီးခဲ့တဲ့ နိုဝင်ဘာ ၂၉ ရက်နဲ့ ၃၀ ရက်မှာ တအာင်းတပ်မတော်- TNLA ထိန်းချုပ်ထားတဲ့ မိုးမိတ်နဲ့ မိုးကုတ်မြို့ထဲကို ဝင်ရောက်လာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
