ပျားကြီး၊ မတ်လ ၁၅ ရက်၊ စဥ့်ကူး
မန္တလေးတိုင်း စဥ့်ကူးမြို့နယ် လက်ပံလှကျေးရွာ ဈေးတန်းမှာ စစ်ကောင်စီတပ်ရဲ့လေကြောင်း တိုက်ခိုက်မှုကြောင့် သေဆုံးသူ ၃၀ အထိ ရှိလာတယ်လို့ ဒေသခံတွေက ပြောပါတယ်။
မနေ့ မတ်လ ၁၄ ရက် ညနေပိုင်းက လက်ပံလှရွာ ဈေးတန်းကို လေကြောင်းနဲ့ တိုက်ခိုက်ခဲ့တာဖြစ်ပြီး ထိခိုက်ဒဏ်ရာရသူထဲက တချို့ဟာ ဒီနေ့မှာ ထပ်မံ သေဆုံးခဲ့တာပဲ ဖြစ်ပါတယ်။
“အသက် ၄ လအရွယ် ကလေးအပါအဝင် ကလေး ၆ ယောက် ပါတယ်။ ဒဏ်ရာ အရမ်းပြင်းတဲ့သူတွေထဲက ထပ်ပြီး သေဆုံးတဲ့သူတွေလည်း ရှိတယ်။ အသက်လုနေရတဲ့သူလည်း နည်းနည်းကျန်သေးတယ်ဗျ” လို့အသက် ၅၀ အရွယ် ဒေသခံ အမျိုးသားတစ်ဦးက ပြောပါတယ်။
မန္တလေး-မိုးကုတ် ကားလမ်းမနဲ့ သပိတ်ကျင်း လမ်းဆုံမှာရှိပြီး အဝေးပြေးကားတွေရပ်နားလေ့ရှိတဲ့ လက်ပံလှရွာမှာ ရာနဲ့ချီတဲ့ဈေးဆိုင် တန်းစီကာ ရှိနေပြီး လေကြောင်း တိုက်ခိုက်မှုကြောင့် နေအိမ် မီးလောင်ပျက်စီးခဲ့သလို ဈေးဆိုင်လည်း ပျက်စီးခဲ့ပါတယ်။
“ဒါဟာ အရပ်သားပြည်သူတွေကို ဦးတည်ပြီး တိုက်ခိုက်တဲ့ လူမျိုးတုန်း သတ်ဖြတ်မှုဖြစ်တယ်” လို့ သမီးတစ်ဦး ဆုံးရှုံးခဲ့ရတဲ့ ဒေသခံ အမျိုးသားကြီးတစ်ဦးက ပြောဆိုပါတယ်။
စစ်ကောင်စီဟာ အလယ်ပိုင်းတိုင်းစစ်ဌာနချုပ် အခြေစိုက်တဲ့ မန္တလေးမြို့မြောက်ဖက်က မတ္တရာ၊ စဥ့်ကူး၊ သပိတ်ကျင်းနဲ့ မိုးကုတ်မြို့နယ်က နေရာအများစုကို လက်လွှတ်ဆုံးရှုံးထားရပြီး လက်ရှိမှာလည်း သပိတ်ကျင်းထဲက စစ်တပ်စခန်းကို PDF ပူးပေါင်းတပ်ရဲ့ ဝိုင်းဝန်းပိတ်ဆို့မှု ခံထားတာကြောင့် အရပ်သားကို ဦးတည်ပြီး လေကြောင်း တိုက်ခိုက်မှုနဲ့ လက်နက်ကြီးပစ်ခတ်မှု ဆက်တိုက် ပြုလုပ်နေတယ်လို့ ရှေ့တန်း သတင်းရင်းမြစ်တစ်ဦးက သုံးသပ်ပြောဆိုပါတယ်။
မန္တလေးမြို့နဲ့ အနီးဆုံးဖြစ်တဲ့ မတ္တရာမြို့နယ်ထဲမှာလည်း မတ်လ အစောပိုင်းကစပြီး ၁၂၀ မမ လက်နက်ကြီးနဲ့ နေ့စဥ်ရက်ဆက် ပစ်ခတ်တိုက်ခိုက်နေပြီး မတ်လ ၁၁ ရက် တစ်ရက်တည်းမှာတင် လက်နက်ကြီး ပစ်ခတ်မှုပေါင်း ၄၈ ကြိမ်အထိ ရှိခဲ့ပြီးတော့ ဒီနေ့ မနက်ပိုင်းလည်း ထုံးဘိုရွာကို လက်နက်ကြီးနဲ့ ၃ ကြိမ် ပစ်ခတ်ခဲ့တာကြောင့် အမျိုးသား ၂ ဦးနဲ့ အမျိုးသမီး ၂ ဦး ဒဏ်ရာ ရရှိခဲ့တယ်လို့ မတ္တရာဒေသခံတွေက ပြောဆိုပါတယ်။
